من قصائد / محمد بن أحمد السديري

[صبر]

لولاه ما روضت نفسي




لولا الرجا و أعلل القلب بوعود
بوعود خل صار شوفه شفاقه

لولاه ماروضت نفسي على الكود
ومن كل خلق الله عشقته عشاقه

اختار قلبي بالهوا ناعم العود
ما غيره أحد بالمخاليق شاقه

طفل عليه من البها ستر و عقود
زين القوام اشباه وجهه دقاقة

ان كان شفته فتح القلب بورود
و ان غاب دايم دمعتي من فراقه

طفل سحرها روت بشفاه منضود
اللي نهب مكنون قلبي سراقه

مادام هو ماجود فالحب ماجود
وسط الضماير مبهمات حلاقه

يا ناس أنا أحبه ولا فيه منقود
وقلبي لغيره ما يعرف الصداقه

يا ناس حبي له بلا سلم و حدود
و فراق روحي من سبايب فراقه

[صبر]

يافيصل اودعك توديع من غاب

اشوف ديّاني وقف لي على الباب
يبغى الوفا مني ويبغى حسابه

ماينسى دين تقفاه طلاب
والدين مايوفيه كثر الطلابه

يافيصل اودعك توديع من غاب
لاترتجيه انه يجي من غيابه

غيبة دهر ماهوب شهر عد وحساب
في مظلم ينهد فوقي ترابه

اوصيك يافيصل تخير بالأنساب
كل تعوض فيه كون النسابه

[صبر]

طيرك غدا بالصيف شاف التناكير




طيرك غدا بالصيف شاف التناكير
حدنه العقبان لين اقلعنه

والطير وقت القيض شربلاخير
تتعب وكل ايديك مايشبعنه

عندي عوض طيرك ليال المخاظير
فـرخ قرانيس الهوا علمنه

تحير في وصفه جميع الصقاقير
نضمن عيونه سود بحجورهنه

اشقر عديم ينثر الريش تنثير
وايديه شكاة الغلب ينثرنه

وان صرة قدام السلف والمظاهير
بامخافق الاجوال يعجبك فنه

طيريعوضك ياصبي المخاسير
وخل الصياح اونة الصدر كنه

قبلك بكينا الطير ويا الغنادير
قد عذبن القلب ثم اوجعنه