هدية المنتدى للجمهور : شرح بالصور عن مفاتيح قراءة التحليل المالي + دار الأركان مثال

[وحـي القلم]

دار الأركان أنموذج على مفاتيح القراءة المالية


الآن..أبغي منك تجدد القهوة والشاهي لأني بعطيك مفاتيح تكشف لك الموقف المالي لأي شركة و اخترت دار الأركان لعدة أسباب:

- سهم شعبي وموجه للجمهور العام.
- شرح باللغة العربية والعامية.
- تقدر تطبق القراءة المالية على باقي الشركات.
- ولأن الموضوع موجه للجمهور العام..راح أتجنب المصطلحات الأكاديمية والزحمة في التفاصيل لأنها تخلق تشويش وضبابية وعسر بالفهم للجمهور.
- لكن بنزل لك أهم 5 صور وبعدها لو يجيك دكتور بالمالية أو تدرس ماجستير بالمحاسبة أو تأخذ دورات ..فلديك فهم أساسي وما راح ينضحك عليك.
- الهدف من هذا الشرح..(لونته بالأحمر) بختصر عليك آلاف الريالات بالدورات وبختصر عليك هياط المصطلحات وبختصر عليك هياط بعض الناس اللي يسوي فيها فاهم ويصعب عليكم هالأمور
لأني فتحت لك الباب إلى عالم القوائم المالية بحيث لما تخلص من قراءة هذا الموضوع..مباشرة راح تفهم كل شركة وبنظرة واحدة بل تقدر توسع علومك وتسوي بحث بقوقل أو تتابع قنوات اليوتيوب وأنت أصلا عندك قابلية لفهم الشركات.

لذلك لا تبدأ بقراءة هذه المشاركة إلا وأنت مروق على الآخر عشان تثبت الفهم من أول مرة وبعدها عيش حياتك.

أولا: الصورة الأولى



- نروح لموقع تداول ونختار دار الأركان ونضغط عليها.
- بعدها تطلع لنا الصفحة اللي بالصورة عشان نضغط على القوائم المالية.



ثانيا: الصورة الثانية



عندنا التالي:
1 - قائمة المركز المالي: هذي هي " الميزانية العمومية" أو هذي الميزانية الأم التي تعلنها الشركات وإذا تأخرت بالإعلان سيتم معاقبتها من هيئة سوق المال...وهذي هي الماستر أو التقرير الشامل المالي للشركة يعني هي الأساس.
2 - قائمة الدخل: هذي تتفرع من التقرير الأول بس تختص بحساب الأرباح والخسائر.
3 - قائمة التدفق النقدي: هذي تتفرع من التقرير الأول بس تختص بالنقد أو الكاش أو الفلوس.

بعدها راح أشرح لك كيف تقرأ كل قائمة ولا تنخرع من الأرقام ..تراها مثل 1+1 يساوي 2 لكن اقرأ الموضوع معاي وراح تكتشف أنه أسهل من السهل


ثالثا: الصورة الثالثة



قائمة المركز المالي: اللي هي الميزانية وهي الأساس.

(((فقرة أ)))

- الموجودات المتداولة: هي الأصول اللي تقدر الشركة تبيعها خلال 12 شهر يعني أصول مملوكة باسم الشركة وتقدر تبيعها بسرعة , يعني مثلا الشركة عندها 50 سيارة و مليون سهم في شركات و 100 مكتب ومكاين تصوير فهذي كلها أصول تمتلكها الشركة وتقدر خلال 12 شهر تبيعها ( لو رغبت الشركة).
الموجودات المتداولة = 9,922,698
لذلك لازم نحط جنب الرقم 000 أصفار عشان نقرأها صح

ليش نحط 3 أصفار؟

الجواب: نلاقي في نفس الصورة آخر شئ (جميع الأرقام بالـ ألف) يعني 1000 ..يعني رقم الألف فيها 3 أصفار وبالتالي أي رقم تشوفه في هالميزانية حط جنبه 3 أصفار.
لأن لو كتبت هالأرقام الكبيرة ما راح تكفي الصفحة لذلك يختصرون الأرقام ويحطون ملاحظة بالأسفل أنها برقم الألف.
الموجودات المتداولة = 9,922,698,000 ( يعني تسعة مليار و تسعمائة واثنان وعشرون مليون و .....) يعني قول 10 مليار

- الاستثمارات: هي أصول عبارة استثمارات للشركة (غير) نشاطها الأساسي، مثلا دار الأركان شركة عقارية لكنها اشترت أسهم في شركة تقنية أمريكية بقيمة 10 مليون دولار..فالأسهم هذي هي الاستثمارات.
الاستثمارات = 20,939,246,000 ( مو تنسون نضيف 3 أصفار ونقول أنها 20 مليار و تسعمائة و وتسع وثلاثون مليون و..) يعني قول 21 مليار ريال.


- الموجودات الثابتة: هي الأصول اللي تقدر الشركة تبيعها (بعد) 12 شهر يعني أصول مملوكة باسم الشركة وتقدر تبيعها بس يبغي لها وقت أكثر من سنة..مثلا الأراضي الخام و الأبراج.
الموجودات الثابثة = 72,180,000( مو تنسون نضيف 3 أصفار ونقول أنها اثنان وسبعون مليون ومائة وثمانون ألف ريال) يعني قول 72 مليون ريال.

أجمالي الموجودات = الموجودات المتداولة + الاستثمارات + الموجودات الثابتة
لو تسوي عملية حسابية سريعة يعني أفهم إن أصول الشركة هي = 30 مليار ريال و 900 مليون (عشان خاطري نقول 31 مليار)

(((فقرة ب)))

دام فهمت كيف تقرأ الأرقام وكم أصول الشركة ...خلاص ..راح تقرأ الباقي بكل سهولة ونكمل على نفس الصورة

- المطلوبات المتداولة: هي القروض اللي على الشركة ولازم تسددها (خلال) 12 شهر، يعني مثل قروض البنك قصيرة الأجل ومثل السحب على المكشوف.
المطلوبات المتداولة = 2,105,722,000 مو تنسون نضيف 3 أصفار ونقول 2 مليار و مائة مليون وعليها.

- المطلوبات غير المتداولة: هي القروض اللي على الشركة ولازم تسددها (بعد) 12 شهر، يعني مثل قروض البنك طويلة الأجل اللي على سنتين وأكثر.
المطلوبات غير المتداولة = 9,802,714,000 مو تنسون نضيف 3 أصفار ونقول 9 مليار و ثمان مائة مليون وعليها.

(المطلوبات تعني قروض على الشركة وبالتالي صار مجموعها حوالي 12 مليار ريال)

أجمالي المطلوبات وحقوق المساهمين = المطلوبات المتداولة + المطلوبات غير المتداولة + حقوق المساهمين
لو تسوي عملية حسابية سريعة يعني أفهم إن القروض على الشركة مع حقوق المساهمين هي = 30 مليار ريال

س: لاحظوا أن 30 مليار هي نفس الرقم لأصول الشركة ونفس الرقم للقروض وحقوق المساهمين(اللي داخل المربع البنفسجي).....ليش كذا؟؟
ج: لأن هذي هي المعادلة الأم في المحاسبة وهي قانون المحاسبة و عبارة عن

الأصول = الإلتزامات + حقوق الملكية

لذلك كل ميزانيات الشركات راح تلاقون نفس الرقم على الجهتين ..ولو لقيت أي فرق في الرقمين فاعرف أن الميزانية خطأ.
لذلك كان الدكتور لما يختبرنا .. وتكتشف أن الرقم مو متساوي فاعرف أن حلّك خطأ.