القصيد شعور يطلع على الشاعر دليل
ويتضح للناس دق العلوم وجلها

الهزيله ما يغني بها كون الهزيل
والجزيلة عند اهلها وهم كفوً لها

واكثر الشعار في وقتنا حطاب ليل
لا لقى له حاجةٍ في طريقه شلها

وجاك يشعب سابقه تعتدل وإلا تميل
وصفقت له شلته والقناة احتلها

البيوت مكسره والهدف ما من حصيل
ويطوي المكره على خيبته ويفلها

وان لقى له عاقلً يرشد القلب الهبيل
ينصحه ويقول اخذ ذي وهذي خلها

لا استفاد من النصيحه ولا صمَد جميل
فيه ناس لو تكب القصيد احسن لها

لابغيت الشعر يبقى لجيلً بعد جيل
وكل ما اصغوله هل الصنف قالوا سلها

فأرتفع به فوق وابنه على معنى جزيل
وكل مامريت هزله بدربك زلها

الكلام الذرب يقنع ولو انه قليل
والسماجه كل رجل ً شريف يملها

والقصيد انواع شيء كما حد الصقيل
كل ماتوحيه الاعداء تزايد غلها

وعند من يعرف معانيه مثل السلسبيل
الشعور يهزها والكبود يبلها

وشيء ماينقال وانا على ربي دخيل
من هزيلات السوالف ومن طبل لها

والجواهر في البحر والبحر قاعه طويل
ناس تاصلها لكن ناس ماتاصلها