وردت لي هذه الابيات ولا ادري من قائلها:-

قامت من المنشأ تلوح المراويح
نشوف بارقها ،،، ونسمع رعدها

على ديار أهل الوجيه المفاليح
الوافية ، والصادقة ، في وعدها

براقها يضوي سواة المصابيح
سحابة يسبق مطرها ،، بردها

إلى أمطرت نرفع يدينا بتسبيح
للي رفع سبعٍ ،،،بليا ،،، عمدها

أنه يزول الباس ،،،،،قبل التراويح
ويفرج على العالم ويطلق عقدها

الناس قامت تشكي الباس وتصيح
وعلومهم ضاعت ،،،وقصر جهدها

اللي على الإنعاش ،،واللي مجاريح
واللي من الأموات ،،،داخل لحدها

ياخالق الأكوان ،،،، يامجري الريح
ماغير عفوك ،،، فزعة ،، نعتمدها

انت العظيم وفي يديك المفاتيح
مابه يدين ،، الا يدك ،، فوق يدها


وفي نفس اليوم كان ردي التالي ..

سر يافكر واقطف ثمار التباريح
من غابةٍ فيها المعاني شهدها

فيها من الريحان والنفل والشيح
والعود الازرق من كمالة عددها

ويالله بـمـزنٍ ضافياتٍ ملاقـيـح
تغسل اثر ما بالنفوس وكمدها

رواحـة ٍسواحـة ٍ كـالمراجـيـح
فواحـة ٍ بواحـة ٍ من جـهـدها

يفرح بها الرعيان هم والفلاليح
و بـر الرويضة خصها مع بلدها

يامنجي ٍ يونس بفضل التسابيح
يارازق ٍ مـريـم بعيسى ولـــدها

ترحم بحال اللي سلامه تلاميح
وحتى صلاته بالجماعة فقدها

يحتاج له ساعة خروجه تصاريح
في كـل مرة لو تـكاثـر عددها

تفـرج لنا يـارب بشهـر التفاريح
رحمتك ياربي على من قصدها

نبي نصلي الفرض هو والتراويح
مع ركعتين ٍ ياسعد من سجدها