بدأت قصتي مع الاسهم عن طريق الوالد رحمه الله في بداية السبعينات الميلاديه كان مكتتب في بنك اسمه بنك ملي باكستان اذا لم تخني الذاكره . فكان رحمه الله مكتتب بأسمه واسماء اولاده فمن هنا بدأت قصتي مع الاسهم . وكان رحمه الله لا يجيد كتابة الانجليزي وكنت انا او احد اخواني نعبي له الخانات في النماذج التي تأتي له من هذا البنك . فبدأت اسأل عن هذا العلم الجديد بالنسبه لي اللي هو التداول في الاسهم .
في شي في الدنيا هادي اسمه تداول اسهم اعرف الاسهم وهي التي كانوا يتحاربوا بها زمان مع السيوف والرماح غير كده ما اعرف شي عن الاسهم وذلك حسب ما كنت اقرأ في روايات عنتره بن شداد و الزير سالم وغيرها . ايامها كانت القراءه ياه شي مشوق ومهم كنا نقرأ بالساعات ونتناقش فيما نقرأه وكل واحد يتكلم عن ما قرأه ويطلع الفوائد من ما قرأه ويطلع عليهاالزملاء حتى تعم الفائده للجميع واذا شفت كتاب حلو ومفيد توصي عليه الباقيين عشان يأخدوه واللي ما عنده امكانية الشراء يستنى خويه يقرأ الكتاب ويعطيه هو يقراه كمان وهكذا تعم الفائده للجميع والفائده تعم الجميع . اه يازمن .
المهم شكلي دوشتكم شويا حاولت ابحث عن مايعينني على معرفة هذا الشي الجديد تسأل مين تسأل مين ما في فائده المكتبات كانت محدوده والناس تسألهم يقولولك ايش اللي تقولوا هادا ناقصين نحنا اسهم ورماح ليه بنحارب نحنا والا ايه . واللي يقولك ياواد ايشلك وايشل الهرجه هادي خليك في مزاكرتك احسن لك مالك ومال الحاجات هادي . سبحان الله بعض الاوقات الواحد تنعمي بصيرتوا ما ادري كيف وما يفكر صح دحين انت رايح تبحث وتدور وتسأل برا عن الهرجه هادي وعندك في البيت الوالد الله يرحمه فاهم كل الهرجه وراح يفيدك صح يا ولد فين عقلك انت . بس وبدأت اسأله الله يرحمه عن الاسهم وكيف طريقتها وايش هيا طالع فيا وشالني وحطني فوق و تحت وساكت اعتقد والله اعلم انو يفكر ويقول ايشلوا وايشل الكلام هادا ما ينتبه لدروسوا ومذاكرتو احسن له . بعد الالحاح الشديد وبعد وقت طويل . الوقت الطويل ليش لأنو زمان مو زي دحين الاب دحين مو زي اول ولا الاولاد زي اول
. دحين الولد يبكيلوا شويتين قام ابوه يجري جري عشان يجيب له الحاجه اللي يبغاها مدري هو حب او خوف مدري . زمان اذا تبغى تتكلم مع والدك لازم تفكر كتيروتشوف الوقت المناسب وتسأل قبل ما تكلمه وتشوف الاوضاع اذا هي مناسبه والا لا وتقرب شويا شويا الين يشوفك ويعرف مقصدك يقوم يناديك ويقلك ها ياواد ايش عندك وتبدأ شويه شويه تجمع الكلام وتقولو اللي عندك ويقولك طيب بعدين وتستنى عاد الين يرد عليك . الاباء زمان كان لهم هيبه ووقار واحترام شديد جدا . اكيد دوشتكم لكن الكلام يجر بعضه ونشتل شويه يمين ويسار . المهم بدأ الوالد رحمه الله يعطيني شوية معلومات مهمه عن الشركات اللي بعضها شركات مساهمه وبعضها مساهمه محدوده وغيرها من الشركات وكيف المساهمه في الشركات وكيف هو يكتتب في الشركات و حاجات كتيره عن الاسهم . كان في زمان شي اسمه الحساب التجاري يختلف شويا عن الحساب اللي اخذناه في المدارس برضوعلمنا اياه ونفعني جدا بعدين في الاسهم وحساباتها الله يغفر له ويرحمه . وبعدين اتعلمت شوي شوي من مصادر اخرى الين فهمت حاجات كتيره عن هذا الشي اللي اسمه اسهم . طبعا هذا الكلام استغرق سنين وكبرنا وفهمنا اكثر
اقولكم الفطور جا وما اقدر اتحمل على قول المثل مقابلة الجيش ولا مقابلة العيش . سلام عليكم .
وسامحونا .