متابعة الموجة الصاعدة ( 2020 )

[ابو سابك]

سوالف شيبان

من زمان عن هالسوالف الله المستعان يا اخوان
دوخونا كلما قلنا بتزين الأمور لخبطوها .
عموما الاسعار هذه أتوقع لو صارت حرب ما وصل لها السوق فمن اشترى وانا منهم يصبر وبأذن الله لكل فعل ردت فعل مساوية له بالمقدار ومعاكسة له بالأتجاه



كان لي صديق كل ما وفر من راتبه شيء اشترى فيها كم رأس من الغنم لين صار عنده اكثر من مئة راس
والرجال اضطر يجيب عامل راعي غانم ويصرف عليها من راتبه أعلاف وشعير وبرسيم ومن غير الجهد اللي يبذله في كل يوم رايح جاي عليها .
قلت له يا بو فلان وش لك بدوار الرأس والتعب اللي تتعبه مع هالغنم وما وراها غير الخسائر والتعب .
قال يا بو فهد انا إذا ما مسكت فلوسي الفلوس بتروح ولا اعرف اجمع مثل الناس قلت خليني ابلش نفسي بالهشغله عساني بس اجمع فلوس ومنها اتونس لا ضقت من جلسة البيت والغنم تجيب غنم اكثر وهي بعدين تصرف على نفسها ومع الوقت ترتفع اسعارها واتربح فيها .
اليوم وانا جالس على شاشة التداول وأشوف اسهمي
الزينة والغالية على قلبي واللي اشتريتها بأسعار ما شفتها من سنين تتهاوى اسعارها حول النسب وبعضها معلن توزيع ارباح وبعضها احتياطياته تؤهله يمنح اسهم مجانيه وبعضها توزع عوائد اكثر من 7 و 8 بالمئة بالسنة وفي الجهة المقابلة اسهم شركات تعلن عن خسائر وانخفاض في الارباح وشركات الله اعلم بحالها على النسبة فوق .
قلت في خاطري والله ما أبيع سهم واحد واللي الله كاتبه بيصير ومالي الا نصيحة صديقي راعي الغنم
بأخذ ارباحها وانتظر منحها واتونس بصفتها بالمحفظة و إن الله أعطانا عمر استلمنا ارباحها وزودنا الكميات وعسى ربي يغير الحال و تزين الأمور و أقول في خاطري وأونس نفسي على الأقل من اشترى عند ال 6000 ما هو مثل اللي اشترى عند 9000 واللي يشوف مصيبة غيره تهون عليه مصيبته

الوقت هذا ما هو وقت مراهنة على ارقام
الوقت هذا وقت رهان على أصول الشركات وعوائدها
والزمن كفيل أن يصلح ما أفسده العطار .
وفي النهايات لا يصح الا الصحيح
والله الموفق للجميع

الله يوفقك يا بو فهد فعلا اطع رأي صديقك ( راعي الغنم) انا مثلك اذا خالفت نصيحته دايما اخسر والحمد لله منذ اتبعت النصيحة والامور بالسليم -ولو تأخر الربح لوقت طويل.
الله يزيل الغمه ويصبر كل خسران ويرزقه السلوان
وينسينا بما يسعدنا .
وربما فيها خيره والخيره بما يختاره الله لنا
رضينا ياربنا بما كتبته لنا (من رضي فله الرضى ومن سخط...).