من اشعار فهد عافت

[صبر]

الصورة

كانت الصوره جميله ... و كان في الصوره طفل

و خلفنا كانت مره تلبس عباه

و اطرف الصوره ولد يضحك صباه

و قربنا حطت حمامه .... قربها حطت حمامه

تذكرين اش كثر كانت ابسط الاشياء تثير الانتباه

و في البعيد احتفظت الصوره بمنظر مهر جامح

و في البعيد فاخر الصوره شخوص بلا ملامح

تذكرين ايش كثر كان

الوقت ... شفاف و ... حنون و ... طيب و ... مبهج و ... دافي متسامح

و كان في الصوره و هذا اجمل اللي كان في الصوره ... طباعك

نظرتك و الشيطنه في داخل عيونك جنونك ... و اندفاعك

بسمتك لما تطوقني ذراعك

اذكر انك قبل ندخل هذي الصوره في لحظه التفتي لي و قلتي قول احبك

قلت اخاف ليا تكلمت احرم اذني من سماعك

كانت الصوره جميله ... كنتي في احلى نفانيفك

كأن الصبح ضيفك

او كأنك من كثر ما كنتي انتي كنتي طيفك

كنتي في اكثر مواعيدك وفا

و كنت انا في ايديني دفا

كانت الصوره جميله ... و كان في الصوره طفل

[صبر]

أسمّيك المطر


سلامات تطول الغيم وعذوق النخل والطير .. تزف ابه الشموس من النفوس لشيخها الغالي
هلا ياللي خلقت بيوم راد الله بخلقه خير .. ابغني وابنطح بالهلا ياسيدي فالي
تمسكنا بحبل العروة الوثقى وهو تدبير .. تكافخ به بيارق عزنا في المر والحالي
وسلمك الولي للشعب حب وللوطن تعمير .. وللمحتاج تاج وللعدا ضيم وغربالي
اسميك الجبال الشم والقى بالحكي تقصير .. خفافك لو نحملها الجبال تدور الوالي
واسميك القمر زلة لسان ومالقابه غير .. شعاع ينطفي وانت اول انوارك بلاتالي
اسميك المطر حاشاك لامامنت المطر يامير .. وهو لاعطا نزل واما انت تعطي وانت في العالي
اسميك انت مااسميك غيرك باخر التفكير .. بغيت القى شبيه لك سواك وماتهيالي

[صبر]

النظرة السمحة


قالت وش العلقم الترياق؟
ومحدٍ ضمادة سوى جرحه

كل اللقا لو نظرت فراق
وكل البكا من ورا فرحة

محدٍربح كود لما باق
محدٍ خسر كود من ربحه

مابه خلوق وعديم أخلاق
للكل نسبة من الصحة

يا شاعري والوهم حرّاق
أجدى من مصافحة ذبحه

خذها حقيقة من الاعماق
صدرك هو اللي طعن رمحه

مافي الكتابه جديد آفاق
كم تشبه الكسرة الفتحة

قلت اسمعيني صوتي تاق
يجمع لك الكل في شرحه

ان قلت بعض الفراق عناق
أو قلت بعض الكفن طرحه

لاني بكاذب ولا آفاق
لكنها النظرة السمحه

أكبر خطا اننا نستاق
تعريف للبحر من ملحه

انتي اتبعيني..أنا أوراق
أو تهجريني..أنا صفحه

للشعر للحب للاشواق
لليل في داخله صبحه

بيني وبين القلم ميثاق
يهدّني..وأبني في صرحه

ذي راحتي وإسألي العشاق
العاشق كتابته مسحه

[صبر]

عصفورتين و شمس


على حد العطش أرسم فمي غيمة وخمس أطفال
على حد الظلام أشعل يدي عصفورتين وشمس

مكاني مو مكاني والزمان يشوفني أشكال
أجي مرة صراخ أقوى من الحكمة ومرة همس

أنا كرهي خبال ولا عشقت أعشق بعد بخبال
ولا أعرف الوسط بين الحلول وذي طبيعة نفس

وأنا عشقي لباكر ولاجل ذا باركض رفيق ظلال
وفي زوادتي تمر النخيل اللي زرعني أمس

معي في الذاكرة بنتٍ توصيني بمشط وشال
وصوت أمي يوصي لا تجي ربعك بخاطر عمس

وأنا أمك لاتنام بليلةٍ وأنت خلي البال
وخل أدنى طموحك لانظرت لنجمتين اللمس

وأنا أمك لاصعدت إصعد مثل دعوة فقير الحال
ولامنك نزلت إنزل مثل غيثٍ بيحيي غرس

وعلى حد العطش إرسم فمك غيمة وخمس أطفال
وعلى حد الظلام إشعل يدك عصفورتين وشمس

[صبر]

غنّى المغني



غنى المغني ودار الرقص في الحفله
والضي شعشع وضج الطار بالعالي

وانا اسرق الشوف لعيونه على غفله
وادور اوصاف تحلابه وتحلالي

صارت حروفي معه ريمية جفله
لكني امسكت بالمعنى على التالي

اصدق من الجوع واطهر من بكا طفله
واهدى من الليل وادفا من عتب غالي

له في الحنايا عصافير ترفرف له
ليت المغني يمول له بموالي

واصابعي من لظى شوقي تكاتف له
يفرك بعضها بعض واصيح عزالي

وانا ادري ان الذي جنبه يسولف له
عني وهو يبتسم ويقول : انا مالي

كيف انت مالك وانا ماجيت للحفة ؟!
الا علشان اشوفك يابعد حالي

[صبر]

هب الكرز واستجمع الفل فله


هب الكرز واستجمع الفل فله
ياكيف انا ماقول للشعر لبيه

حزن مثل شباك صبح تبله
قطرة ندى تزحلقت كنها ايه

بشفاه عاشق ساهي واستغله
خبيث باسم اللي ذبحه بتغليه

ياسيدي لاحزانك المسفهله
سحاب وانت تظلله وانت تسقيه

اوميت لي وانا الغريب الموله
ورديت لك وانت العجيب بمعانيه

كنك تعرف ان الشعر فيه خله
لا هي على وزنه ولا في قوافيه

اردى الشعر قول يجيك بمحله
واحلى الشعر قول محله يجي فيه

ويش الدرر ياصاحبي غير عله
في صدر محار الحصى حيل موذيه

نحزن وفينا يلتقون الادله
لا من بغوا للعيد طفل يزكيه

ياما كثير اشيا ممله .. ممله
وبالشعر يلقى الادمي ما يسليه

لولا الصبر كيف الاهل والاهله
ولولا الشعر كيف العتب والمشاريه

والناس فيها من عزومه تتله
وتوصله فوق العليا وتعطيه

والناس ياما في الخلايق جبله
ياكل ويلتم الرخم في علابيه

لو بروزوا له صورته في المجله
الناس تدري عن علوم المسافيه

وانت الكريم اللي حجاجه يفله
ما عنده الا ابشر بمطلبك ياهيه

وانت الشجاع اللي سيوفه تسله
والفيلسوف اللي انتهى في مباديه

هب الكرز واستجمع الفل فله
لبيه .. ثم لبيه .. ثم الف لبيه

[صبر]

مدد

ولا .. روح من قبلها .. ولا بعدها من بلد ..

لها يشعل الشمس ... قمح الرهان ..

على بعد صبحين من (ميمها )

يغسل الحبهان النساء بالمسا ..

دِما سيّلت من محبينها ..

و الرزق بالأمهات ..

الأحد..

سندبد ,, رغبة البحر..

قلت السما ... مثل شبكها ،

مسّها الأزرق الباتع ..إرتفعت ..

إرتفعت بلا عمد ..

تمريت في ( ميمها )

أيِّنا كان أنا .. وأيّنا كنت ذاك ..

هو اللي هنا .. قلت أنا .. وانا قال انا اللي هناك ..؟!!

لو نوى يسأل إثنينها .. وينها؟؟؟

طاش فيه البَرَد ..

وأربك الزر في الخيزران ..

أصبح الخير .. زان إسمها ..

كل ما ضيّعتها الجهات ..

إستدلت على شاعر في الثلاثين من وحدته .

بنت ..

لا تظلم الماء ... ولا تسلمه ..

ليلها..

فسّر العاشق بنجمة .. تحلمه ..

صبحها ..

علّم الأرض ما لم تكن تعلمه ..

وفي خيلها و خلاليخيلها .. أفلا تشمسون ؟؟؟

الثلاثاء ..

ولد ..خارج من الدعاء ..

البنفسج ..

سجد .. في صلاة أربعاء..

قالها ..

قالها في الكلام ..

من الماء .. لما لا نهايات للبرتقال ..بفوانيسها ..

كان .. دعس الحمام .. واضح الوشم في ساعد الرمل ..

قال ..

أعرف أشياء عن العشب ..

لكنها .. علّمتني متى لازم اللوز يصحى ..

وكيف الخزامى تنامى ..

وكيف الخزامى تناااااااااام ..

و من وقتها ..

كلّما الشمس فاحت ... تريقتها ..

و السلام ..

الخميس إبتدا .. ظلّها بالندى سيّلت كلّها ..

كلّلت جلّها .. بالمدى ..

سُؤْلف الماء حكايتاها ..

والضفاف أعلنت فُلّها ...

و أعلن الغصن ..

عصفورتين وشتا ..من متى ما شدى ..

طفلةٍ في هبوب الغنا ..كلّما شعرها فلّها ..

أورق العشب في حمدها .. وأعشب الضي في ما عدا ..

حامدٍ ما حمد ..

مـــــــدد .. يا صبااااااااااااااح الأغاني ...

مـــــــــــــدد ..

و لا قبلها من منافي ..

و لا بعدها .. من بلد ...

.

.

[صبر]

فتنة الحفل

فتنة الحفل زيدي مشيتك بخترة
كل خطوة بروق وكل لفحه صهيل

باقي بين عقلي والجنون شعرة
اقطعيها ياشينه عاشق مو هبيل

خلي الارض تاخذ شكل غير الكرة
خلي النار تاخذ رمز غير الفتيل

من غدى الليل شعرك قلت أنا بسهره
ومن غدى الصبح وجهك قلت مالي مقيل

ارقصي بين حد الذنب والمغفرة
ارحلي في سكونك واسكني في الرحيل

ارجفي كنك الماء فززته حجرة
واثبتي كنك الفضه بعين البخيل

وانحني مثل غصن في طرفه ثمرة
واوقفي مثل فزعات بدوي اصيل

والفحي علمينا كيف تقدر مرة
تزرع الليل صبح وتزرع الصبح ليل

في عيونك سواد يستحيل أخره
كامنٍ في بياضاً اوله يستحيل

واحد تخزرين وما يجيك خبره
اشهد انه عزيز واشهد انه ذليل

اترك العقد بين الجد والغشمرة
يخبر الناس وش معنى جميل في جميل

كن في الصدر ظبي عيوننا تذعره
ينتفض يذعر الي مذعرينه قبيل

ومفرق الصدر حبات العرق تجهره
كن لك عقد در وعقد من سلسبيل

بينهم حسد ربي بعد ما صوره
عقد وده يجف وعقد وده يسيل

آآه وليا لمحتك مقبلة مدبرة
شفت مثلي نحيل زم حمل ثقيل

دام ذا عجز وش للناس بالمقدرة
دام ذا خصر وش لي بالخواتم بديل

وسط ثوباً خيوطه صمت في ثرثرة
به قليلاً كثيراً وبه كثيراً قليل

كل شيء بجسمك يفضحه يستره
فيه فتنه قصير وفيه حشمت طويل

كنه المخطي الي يطلب المعذرة
وكنه الدامح الزلة عن الي يعيل

في ردونه نقوش له سنابل ذرة
الله اعلم لو ان الريح هبت تميل

كل شيء ونقيضه فيك بالمسطرة
اقرب من النفس وابعد من المستحيل

كنك الكذب لكن ماحدٍ ينكره
وكنك الصدق ولكن مافي يدينا دليل

باشت الغيد زيدي مشيتك بخترة
لاجل اطاول بحرفي شامخات النخيل

شاعر تلمس ايدينك على دفتره
تغرق في اوسط اوزانه بحور الخليل

[صبر]

غالية البقميّة



يفرك المعدن

ويطوي صفحه الشاشه

ريموت الكونترول

تنفتح لندن

على المغلق وتستفحل هشاشه

في العقول

الفم الماخور يتهجى الزواني

في فراشه

من عبارات يجغرفها العفن

يكمل نقاشه

السعوديه بلد ضد النساء

كرش يتهدل

وخفاش يتقندل

والمساء يفرك المعدن

عقارب ساعت الحائط تدندن

كف تضرب لحظه الحاضر

وتدخل قبل لاتاخذ من الاسمنت

تاشيره دخول

اول المشهد خيول

اول المشهد مراه

متوشحه بالكبرياء تهتف

هلا ياطاعة الله والرسول

ويتكحل سيفها المسلول

بالاحمر تغطه في صدور زيفها

حاول يمرغ كل تاريخ

اللبن والتمر

بتراب الكحول

ساعتين من الظلوع

من الدروع .. من الجموع

من الطلوع .. من الدموع

من النزول

وغالية وان عدوا الفريس عدو

فوق مية

فعلها ماله مثيل وزينها

زين بقمية

تلتفت للشمس

تسحب من ذيول الثالث من ايام

هذا الحرب ما يرخي

سدول

ظلة يتنفس اهل الدين

من جموع السعودين منها

مايخلي غطرست طوسون باشا

تقترح من عنجهيه جيشها الغازي

حلول

واختلط تالي القتام

باول خيوط الظلام

وغاليه في غمرة التفكير

راحت وارتخى عنها اللثام

وما اتنبه له غير شايب

يقال اسمه شليويح

انكف عن الشعر عشرين عام

بس في اللحضة ذيك

فز في قلبه حمام

يومين والثالث صياحة

يدق نجرة لضيفانة

جيش وجانا به سباحة

طوسون فرح بطوفانة

وحنا على الموت نطاحة

نفصده وتشيب قيفانة

في بيرقاً تركز رماحة

بنتاً هي الموت واكفانة

في كل الاحوال ذباحة

بالسيف ولا من اجفانة

ينكسر فانوس ضي المشهد السابق

ويكنس شاعر تافة

من ابواب الكتابة

ماسوى رمانتين

قطفهم من صدر

خلة

ناعم العود

المولة

يروي القلب

ويبلة

والمجلة

تربط اول كل سطر بنابح

يحرس ثبات الشيء

اي كان فيما يفرض المكسب محلة

طال عمر الشاعر الي مالقينا

في تواصيفه كلام

امسيه صفق لها حتى الرخام

او كلام ماحترم غير التفاهة

ما استتفه شيء غير الاحترام

ياعزيزي منتهى الحكمه وقوفك

منتهى الابداع يوم انك مشيت

فضل من ربي جعل هرجك غلاف

وصار وصمتك

مانشيت

الثعالب شابعة

والمسالك واعرة

الدعاره طابعة

والمطابع داعرة

وابشرو في العدد المقبل

تنشر صورة احلى

شاعرة

وينكسر قاموس خزي المشهد الفاضح

وتظهر غالية

والكون يعلن مغربة

فوق تربة

ماعلينا

ان فنو ولا فنينا

هم كثير اعداد واعتادو

خذينا في الثلاث ايام

ضعف الي خذو

مهما خذينا

صوت ثالث

رايه العز بيدينا

صوت رابع

والله انا ماخلقنا

غير للايام هذي

صوت خامس

يشرق في عز المغيب

ويتحشرج من مشيب

والله ان مايعبرون

وبه حدينا

راسه يشم الهوى

هيجنا الرمث

وتكسر في السماء

برق السحابة

وغالية بنت

المهابة

ابتسمت بحزن

لكد خيل الصحابة

ينكسر فانوس ضي المشهد السابق

ويبس شارع في اللحظة

الي يثمر الاحمر من شجرة

الحديد

ومايسيل الى طفل يومي بصحف اليوم

وينزل قزازة رجل وبتلويحة

ايد

تتدهش اقدام الطفل بالركض

ويعطيه الجريدة

ويتفرس في القزاز المرتفع

يرسم ظلالة

يثمر الاخضر من شجر

الحديد

ويبس الاحمر بحكمة

برتقالة

والجريدة

مابها الى ترجمة وحل في

مقالة

من صحيفه اجنبيه

غالية متطرفة خطرة

ارهابية

وتدعو للوهابية

وحكم ال سعود

وتتداخل في القصيد الازمنة

والمشهد الاول يعود

غالية والحق رافع

رايتة

ياهل التوحيد ياحمايتة

باكر الثامن من ايام الكرامة

في الليالي الفايتة

صار واحدنا يعرف لطرقهم في

الخيل .. والويل

وبقو هم جاهلين بطرقنا

هم كثار بغير دين

وجمعنا قله ... بدين

ومن هنا نكسب ويظهر

فرقنا

وفي ثمان ايام كر

وفي ثمان ايام فر

ثبت الله كل خير

وشتت الله كل شر

يقطع المشهد ويتنفس ورق

مصنع .. ومعهد .. جامعات

وخضرة في كل قلب

يصبها في كل شارع

اغنيات .. ومهرجانات .. ومزارع

وفي الاخير اطرف الصورة

على مخطوطة صفراء

تطبطب بنت في عنقودها

التاسع

كبرتي غالية

شوفي السعودية

كبيرة مثلها انتي كبرتي

مثلها انتي كبرتي

انت فينا انت في كل السعوديات

ما انتي

صفحة تيبس بتاريخ

الجبرتي

[صبر]

جدران على كتابة !!

يقدر الجمهور يحكي عن دفا الصالة أماكنها المريحة
وحده " البلياتشو" يعرف عن البرد (ف) خشب هذي الكراسي

في نهاية كل عرض (ف) آخر آخر كل ليلة:تستبيحه
عزلة تآخذ من ألاسمنت:طعم من المسا: لحم نحاسي

آتمرا أكتشف كم بعت وجهي للمساحيق القبيحة
آتعرى : ماسوى اللاشي واللاضي والخزي ويباسي

وحشة ملسا رخام بارد صلد يتناسل من فحيحه
ألف نرد يسرد الخذلان لين يفيض بالغسلين: كاسي

أول الليل: أفضح الستر آخر الليل: آتستر بالفضيحة
كل ما قلت:" أنت كاسي يا أنبهار الكل بي" صرت" أنتكاسي"

يصبح الصبح أعرف أني لا قدرت أسكت ولا فاضت قرحيه
يليل الليل أعرف أني لازم أبهرهم أنا نجم الأماسي"

بس أنا الليله: حزين ومنطفي مسدل وخطواتي كسيحه
البلياتشو" في المسرح المسفوك: تنكيت ومآسي

إيه أنا الليلة: حزين ومنطفي منسدل وخطواتي كسيحه
في الجمهور هذا الأبلة اللي أنشدلي وأفتر حماسي

حيل أنا الليله: حزين ومنطفي مسدل وخطواتي كسيحه
في الصالة في حبل الميكرفون الرخو في صعوبة مراسي

رانيا" هي لثغة لسان الطفل ب الرا خطا ولا صحيحة
أجهل الأشيا وأعرف أني أحبك حيل وإنك كل ناسي

رانيا" هذا الفضا: ضيق وأنا: نذر العصافير الفسيحه
إن قدرتي خلك الليله معي تكفين هذا البرد قاسي

"رانيا" مالك شبيه إلا الوطن مالي نقيض إلا النصيحة
زمليني بالهبوب دثري أصابعك في شعر راسي

[صبر]

الفواكه والسلال

كل ماهبت غصون العلم خير

بللتنا عاطفه

بالسؤال الي من الفرحة يطير

من يشمك يالعبير

الورد والا قاطفه

ياهنيك يالاجابه بالسؤال

واهنيك يابلادي في بناتك

مايلات الصعب صعبات المنال

غطرفي ياراية المجد العريق

طو عمرك فارعه

واقطفي من غيم جوك مايقليق

بالعقول البارعه

من من الثاني يشمك يالرحيق

الورد والا زارعه

واهنيك يالسحايب بالنفل

واهني الشمع باللي يحتفل

في ابتسامتها وهي تهدي النجاح

لكل كبير لكل صغير لكل طفل

كل قلب وماحتوى غصن وهبوب

وكل عقل ومافطن

والسعوديات انفاس الطيوب

ان خذن والا عطن

من من الثاني يحفظك يالقلوب

الوطن والا الوطن

[صبر]

حدود السهو



جتني الأسامي وبزهو

اخترت لك اسمين

سميتك : حدود السهو

سميتك التخمين

***

يا أعذب من الماء زلال

نادتني الأسماء تعال

اختار منها مايليق

اشّر عليها وسمّها

والورد قالت للرحيق :

قرّّب عليها شمّها

***

جتني الأسامي كلها

واحترت ويش اختار ؟

قال البنفسج دلّها علي

قالت : أغار

***

يا للي بك الملح اهتدى

لو يكتب الصبح الندى

و أصير لك شبك دار

وأغنية تتلفتك

سؤالها : وين النهار ؟!

جوابها : من عرفتك ..

[صبر]

حكاية آخر مسخرة


قلت للقلب - استفزه-:

والله اني لأتركه

قال : له عندي معزّه

ماأنت - والله - محركه

خل عنك الهرج هذا

اللي بلا معنى

ورح له واعتذر منه وردّه

وان حصل لك بوس يدّه

قلت للقلب - استجيره - :

والكرامه ؟

قال : يارب السلامه

قلت لك رح واعتذر له

وإن حصل لك بوس رجله

والله ان الله خلقني فيك

لأجله

قلت للقلب :

البنات كثار به من كل لون

الجوافة / الكرز / الزيزفون

قال : انا شالله بلاني

بالعفون ؟

قلت : انا شالله بلاني بك

حبيبك ما يبيني

قال : انا ادري

مير ماهي في يديك ولا يديني

قلت : انا بقطع وصاله

قال : انا بقطع وصالي

قلت : يا قلب استحاله

قال : يارجال غالي

قلت : ادور لك بداله

قال : دور لك بدالي !!

[صبر]

سينما الجهرا


فـ سينما الجهرا

كان الواحد يدفع مية فلس لـ "عنتر : يغزو الصحرا"

ميّه وخمسين فلس لعنتر : "يغزو الصحرا "

ميتين فلس لعنتر يغزو

الصحرا , والمتغطرس من ظلمتها ينبت شمسين

(طبعا غزو الميتين احسن من غزو الميّه وخمسين )

فـ سينما الجهرا

مية فلس لعنتر: يغزو الصحرا

ميتين فلس لعنتر: يغزو الصحرا

ميتين وخمسين ل عنتر : يغزو النعمان بن المنذر

ويرجع داحس والغبرا

(وفـ الاعياد ويوم الجمعه يغزو كسرى )

لكن لو ماعندك تدفع ايش راح يجرى ؟

:

أبداً

يسحب عنتر كرسي عند الباب ويجلس يقرا

يقرا فـ أرقام مفكّرته

يوطا خدّ امّه بالنعل

وعنتر تتخنزر عنترته

تُفرك عبله بين اثنين وعنتر لا ينكر معرفة الخزي ولا يعرف منكرته

عنتر سينما الجهرا هذا :

عبد لمن يدفع تذكرته

[صبر]

بطاقه


سلامتك

الله يرجع للدروب خطاك

للصبح ابتسامتك

سلامتك

من قلب يرسل مع سلامه خفقته

سلام

تك

سلامتك

ياللي الرياض آن ذعذع الما

واسفهل القحويان

أضيع في غمّازتين خدودها

وثمامتك

***

أعرف احسك

بس ما اعرف كيف اصيغ معناك

أغسل بشمسك

ظلمتي واقول آنا مضناك

مثل الرياض أنتي حنونه مبهجه

مثل اغنيه للبدر عبد المحسن

تغافل ضجيج المركبات وتتجه

لهناك

أنا ضلوعي أثل , وانتي

مثل مالك مثل

إلا الرياض ان ذعذع الما

واسفهل القحويان

وضعت في غمازتين

خدودها

وثمامتك

سلامتك