باختصار
جيت له جملة مشاعر ، جيته بطيبي وجودي
قصدي يفهم من كلامي سبة جروحي النديه
جودي يا نفسي بهواه وبالمحبة حيل جودي
واسرحي بي في خياله خابرك نفس اجوديه
لو وصفته يا مساعد لو قدرت اخذل قيودي
القى ابيات القصايد في النهاية مبتديه
له شموخ النجم اصله بالسما فوق معقودي
له دفا الشمس ومداها عقب ديمة وبرديه
له مهابة شيخ عالـِـم والعرب حوله شهودي
له خجل عذرا مخطوبة عمها جاب الهديه
وله حنان ام لضناها عندها بكل الوجودي
حضنها الدافي ملاذه لو يجيها بالرديه
له .. و .. له في كل شان ، شي (ن) يحطم صمودي
يحتوي الصمت وعذابه في الليالي السرمديه
اسرفت روحي بغلاه ووثق الخافق عهودي
وانبرا حرفي يتباها يطرب السامع شديَـه
اطلب الله في صلاتي واذرف الدمعة بسجودي
نلتقي بعالي جنانه في سعادة ابديه
باختصار .. هو امسي ويومي ، هو ابعد من حدودي
هو خيال الشعر فيني ، هو حروفي الابجديه
ذي وثيقة اعترافي تحتوي كامل بنودي
شهد احساسي عليها وبصمـَـت ( اسفل ) يديه
رد مع اقتباس
مواقع النشر (المفضلة)