كم رفيقٍ ودنا به على قيد الحياه
وكم ردي ٍيبطي الموت عيا ما يجيه

وكم صبي ٍ شاب راسه ولا حقق مناه
وكم صبي ٍ مات واللي حفر قبره ابيه

وكم فقير ٍمات حلمه من سيوف الغناه
وكم غنيٍ عاش دور الفقير ويشتكيه

وكم جميلٍ من هل الطيب ماتلحق جزاه
لو عطيته نور عينك ، تقول : شوي فيه

وما يدل الدرب من لا تمسك بالوصاه
وما يقدّر نعمة العقل غيرك يالنبيه

ومن عبر بحر الملذة على قارب نجاه
لا يلد العين للبحر ويعود إليه

لو كنوزك كبر سنجار وجبال السراه
الضمير الحي ماهو عقار تشتريه

لو يطلّع كل تاجر من امواله زكاه
ما لقيت من المساكين من يبسط يديه

وإن ملكت أخلاق تملك بها سمعه وجاه
بالفعول وبالطبايع صحيبك لك شبيه

الردي لو يستره ثوب وش يستر رداه
دام مايحشم قرابه ولا يحشم وجيه

إنصحوه يبيع ثوبه ويشري له عباه
طاح من عين المراجل ولا عادت تبيه

والسفيه إن ما تبلاك ما تسلم غثاه
حاول إنك ماتقرب يدينك في ايديه

صافح كفوف الزمن وإبتسم لأجل الحياه
وإعلم إن الله اذا حب عبده يبتليه .