ابيات حكم عن القرابه وحفظ اللسان وغيرها

لاصار بشتك مايلحف قرابتك
لفّه و خلّه مع عباة الحليله


الناس ماتنظر لوجهك وصورتك
لاصار ثقل الحمل ماترتكي له


ترى المراجل وانت نايم تعدتك
وراحت لمن حملك وحمله يشيله


واحذر مقصّك لايعود لّلحيتك
واحفظ كلامك لايجي فيه عيله


ودليل عقلك لاتكلمت هرجتك
مثل السراج ومثل نور. الفتيله


والناس ماتغفر مع الوقت غلطتك
ارفع مقامك عن دروب الرذيله


ترى لسانك هو علامة كرامتك
ومن يخطي الجزله يصيد الهزيله


واحفظ فروض الدين فيها معزتك
والزم كتاب الله وسنّة خليله


واعرف حقوق اللي من الديد غذّتك
من قبل ماتردم عليك النثيله


امّك تراها من مفاتيح جنّتك
حافظ على المفتاح بِأيّة وسيله


كم ليلةٍ تسهر على شان راحتك
عسى جزاها في الجنان الظليله


وخدمتك للوالد علامة رجولتك
لامات ماتلقى مكانه بديله


لشيبته رباك ولاهو ب ذاخرك
يبيك ترقابه براس الطويله


حتّى ايش لو تنثر على القبر دمعتك
مادام كفّك في حياته بخيله


وعلى خوانك لا تمارس شجاعتك
اخوك عضدك ماتحصّل مثيله


للضيف رحّب حين ينزل بساحتك
وكرامته واجب عليك وفضيله


اعطيتك الموجز وعلمي سلامتك
يكفيك عن فلم الف ليله وليله


وترى المنايا يمّ غيرك تخطتك
وموعدك معها والليالي قليله


هذي نصيحه وانت راجع مسيرتك
واعرف طريقك لايجي فيه ميله


واحذر عدوٍّ في طريقك يباغتك
وبرقٍ يجنّب عنك لا تستخيله


يا الله طلبتك في الخواتيم رحمتك
ماغيرك احدٍ كلّ كربٍ يزيله

اختيار موفق اخوي ابو رغد
للاسف القصيدة تعبر عن كثير في هذا الوقت الاسفاف في القول عدم احترام الوالدين احتقار الاخرين ..

صح نقلك أخوي ابو رغد

عز الله قصيدة جزلة

بيض الله وجهك بعد الرد برجع اقراها ثانية

قصيدة كلها مرجلة ورسائل لا بد تعاد قراءتها كثيرا

الله يعطيك العافيه ابو رغد

بارك الله فيك

صح منقولك

جزاك الله خير

كلمات رائعة