محمد بن أحمد بن محمد السديري هو أمير وشاعر سعودي، ولد في سنة 1915 ومات في سنة 1979) تولى إمارة منطقة الجوف في سنة 1938، وفي سنة 1945 أصبح أميراً على منطقة جازان، وبعد ذلك تولى إمارة منطقة الحدود الشمالية.
عرض للطباعة
محمد بن أحمد بن محمد السديري هو أمير وشاعر سعودي، ولد في سنة 1915 ومات في سنة 1979) تولى إمارة منطقة الجوف في سنة 1938، وفي سنة 1945 أصبح أميراً على منطقة جازان، وبعد ذلك تولى إمارة منطقة الحدود الشمالية.
يا عاذلين القلب
يا عاذلين القلب لا تمحنونه
خلو عصى الراي يا صل مناهيه
بالعذل يالعذال لا تجرحونه
اخاف من نصح عن الرشد يعميه
القلب ما يرضى انكم تنصحونه
لا تنصحون القلب عن حب غاليه
حب الموده صايبه تجهلونه
ما منكم اللي ذاق مره وحاليه
اللي يود القلب ما تفهمونه
وجرح الموده ما بكم من يداويه
جرح الموده جايرات طعونه
وين الطبيب اللي يعرفه ويبريه
ياليت طراد المها يذكرونه
ويا سعود قواد الجوازي يحاليه
عسر على طلابه اللي يبونه
يعطي البياح وشرد الصيد تتليه
عليه قلبي كاثرات شطونه
ويلوج وسط الصدر من حركاويه
قلب الخطا يا سعود يا عظم كونه
يكفيه من جور الهوا ربع ما فيه
الزين لو تبعد علينا ضعونه
يكبر غلاه وكن عيني تراعيه
عليه قلبي يابسات غصونه
لا داله قلبي ولاني بناسيه
يا جب على اني عن الشك اصونه
وبالهرج عند الناس يا سعود ما طريه
ادرا عليه من العدا يشمتونه
واخاف من هرج يضره ويوذيه
لا واهني اقرابه اللي يجونه
وانا الى جيته عدوي حواليه
عليه روحي بالفواد مغبونه
وفاتن ثلاث سنين والروح ترجيه
يا سعود عنى لابته يبعدونه
ناس تحلف به وناس تناحيه
البغض وسط قلوبهم يضمرونه
وفي مقرن الحجان تظهر مواريه
ويوقفون السلم دوني ودونه
وعندك خبر قلب تولع بغاليه
اخاف من حبل الرجا يقطعونه
واشرب عذاف السم كدره وصافيه
صبرت لين الصبر فاتت حتونه
واليوم كظم الصبر ماني بقاويه
عز الله ان الصبر غبن ومهونه
وان كان ممدوح العواقب لراعيه
يا سعود فعل الخير ما تفعلونه
وتفزع لمن ضاعت حياته وتنجيه
يا سعود مدولي حبال المعونه
ترى رفيقك جاير الحب طاويه
انت الذي راجيك تقضي ديونه
والليل الاسود ما تعوقك ضواريه
الله من هم بالأعماق مخفيه
الله من هم بلاعماق مخفيه
خيم على مكنون قلبي وكادي
لو هو بحيد ذات من حرصا ليه
وخلا جلاميده هشيم رمادي
يا عين هللي صافي الدمع هليه
واسقى لعطشان الثرى بالريادي
يا ناشد اللي زايد الغبن باريه
أنبيك عن ما صار كان انت غادي
للغرب قلبي ما سمع صوت داعيه
وللشرق قلبي سمع صوت المنادي
متذكر غال على البعد ناحيه
لو حال من دونه ديار بعادي
حق على الحق فوادي مشاهيه
برضاي حاديني من الشوق حادي
يا ناس خالد ما سلى القلب ناسيه
وعيني محاربها لذيد الرقادي
عنها لذيذ النوم همي يناحيه
يحداه عن موق النظيرين حادي
من غاب قلبي زايد البين كاويه
فكري معه والقلب باسماه شادي
فيما مضى ما يشده البال كاميه
وصبرت صبر ما قواه المهادي
اقسمت باسم اللي حبيبه يناجيه
اني للحق شف قلبي مرادي
أروح يم اللي بلاشك نغليه
مالي على فرقاه صبر وجلادي
أرجى عسى رب السموات يبريه
وعسى لها من خالق الكون هادي
ما خاب منهو باعظم اسماه راجيه
رب الفضا محصى جميع العبادي
قالو تحبه قلت بالروح نفديه
الشاهد الله كل هرجي وكادي
دايم يصور لي على البال طاريه
غال إلى شفته يربع فوادي
يفز قلبي كن عيني تراعيه
وعندي على كل المخاليق بادي
جيته وشفت الطيب بأنت مواريه
وارتاح قلبي عقب غبن ونكادي
واليوم قلبي مكننه عراويه
وشيدت رايات الفرح بالمبادي
بالضحك قلبي جاوبنه محانيه
وغذاه من عقب اللهيب البرادي
الحمد لله غالي شاف غاليه
وشفنا بشير الخير والشر غادي
وداعة اللي كل الإسلام ترجيه
مجري غزير المي في كل وادي
مصايب الدنيا
ليا صار جرحي بالفواد مصيب
ولا ادري متى جرح الفواد يطيب
على أي حال وين ابالقا طبيبه
وهو وسط خفاق الفواد عطيب
هني من لا شاف هم يظيمه
وعن الهموم القاسيات غريب
بعيد عن اللوعات ما ذاق كودها
مصايب وسط الفواد تصيب
مصايب الدنيا كفى الله شرها
الرأس منها يالفهيم يشيب
اليا عتت حمر الهموم وقادها
هاجوس فكري والضمير يجيب
تلقيتها بالعزم والعزم غايتي
وفتى بلا عزم تراه يخيب
فتى بلا عزم حياته مذله
والعزم لقلوب الرجال طبيب
ومن لا صبر ابلعسر ما ذاق يسرها
وباب الفرج للصابرين قريب
تذكرت خلان على الشاطئ الذي
على البحر الأحمر والخضم غضيب
يزيد بموجات تناثر له الحجر
اليا شافها قلب الشجاع يريب
تلاطم على الشاطي هواها يقودها
هذي مقابيل وذيك تغيب
تجيبها زفرات قلبي إلى أوجهت
كما اطواب حراب لقاه حريب
تذكرت يوم افكرت حي نوده حبيب
على قلب المريض حبيب
شجاع تعرض للعظايم بعزمه
مفراص ماص للحريب طليب
كبار العظايم بالعزايم يفلها
نجيب تسلسل من عروق نجيب
عديم تسلسل من مواريث نادر
عريب يورث من نماه عريب
سلطان حلال المشاكل بباسه
مصباح ظلما لمن دعاه يجيب
العزم يقصد من عزومه اليا هبت
رجال بحزات اللزوم تخيب
والطيب يوخذ من فعوله اليا جذت
عن الطيب شبان الرجال وشيب
الطيب يوخذ من مقره ومعدنه
ومرقى سنام الطايلات صعيب
ما يدرك الطولات من لا يرومها
بعزم وشوفات الجبان قريب
من عاش بالحقران ما نال مكرمه
وقصر بلا ساس تراه يعيب
ومن نام عن طلب المكارم وفعلها
ماله بكسب الطايلات نصيب
ومن قصرت يمناه عن كسب طايل
عديم الثنا للخاملات ربيب
ومن لا سقى ضده قراطيع مرها
زير النسا للغانيات لعيب
تشره على الطولات كسابة الثنا
ويقصر عن الطولات كل هليب
لقيت يا عوق العديم بن وايل
الطيب بين العالمين غريب
ولقيت يا عوق العديم بن مقرن
الحسد بين الاقربين جنيب
ولقيت يا عوق العديم ابن فيصل
رفيقك الأدنى عليك رقيب
ينقل خطياتك ويخفى فضايلك
وعلى فضح عوراتك يصير حسيب
عفا الله عن عين حريب لها الكرى
غدا دمعها الصافي يصيب صبيب
لاكن دموع العين من حجر موقها
سيل تحدر من فروع شعيب
على غالي عنا حجب دونه الثرى
وفرقاه ترث بالفواد لهيب
تجرعت من فرقاه ما يجرح الحشا
ولا أدري متى جرح الفواد يطيب
يسقيك يا لطايف
يسقيك يا الطايف من الوسم رعاد
وبل على وبل يعلك ويرويك
في كل فج لك مع المزن ميعاد
تسيل وديانك وتخضر مفاليك
حيثك مقر الزين مركوز الانهاد
طفل سبل عقلي ولا فيه تشكيك
ناديت باسمه بين صادر ووراد
وقالو هله مضنون عينك يناديك
واقبل على اللي له القلب ينقاد
وبشرت قلبي قلت زارك مصافيك
بشرت قلب من عنا الوجد قد باد
جاك الحبيب اللي بسره يناجيك
سلم وجاوبته بدرات الانشاد
قلت السبب هوليه تبعد مشاحيك
يقول انا اللي مصخر لك بالوداد
لو طالت الايام فالقلب يرجيك
وحبيت مبسم كاعب بالبها زاد
عن كل مخلوق من الناس يغنيك
يا زين كان انك عن الحب نشاد
انشد جريح القلب والقلب ينبيك
ينبيك عن ود الضماير إلى كاد
وتشق جيبك عند غاليك بيديك
انا وقلبي أي ريش العين بجهاد
ان غبت عني بس قلبي راعيك
يشي لمن جور الهوا حمل الانكاد
يا مورد الخدين باسماك يدعيك
القلب ماله عنك يا زين رداد
بلاه والله يا ريش العين يغليك
قالوا قحوم
عن غوج ابو خالد نشدنا هل الخيل
قالوا لنا يلفح بيمنا سليمه
قالوا قحوم ويرفع الرأس بالحيل
مع اول الغاره يعطعط رهيمه
يهز عرفه والسبايا مشاويل
متذكر هاك الفعول القديمه
يسبق ولا يلحق بركضه تنافيل
والبكره الوضحى خذاها غنيمه
كسبه فتاة ولا يخز المخاليل
هاك الخزيزه حط فيها سيمه
غارة ضحى ما غارته باوسط الليل
على النقا بالكود يجدع خصيمه
من عاش ما حاش الثنا والجمالات
هنيكم ياهل القلوب المريحات
ترعون بالدنيا مثل رعي الانعام
ناس تنفذ صادر الأمر بسكات
لو يفهمون العدل للحيف خدام
فيهم من فنون المذله علامات
ويمثلون ازوالهم كبر الارجام
لو شفتهم صفات فارياهم اشتات
ما من عقول لو تكابرت الاجسام
من عاش ما حاش الثنا والجمالات
ودك يلبس ثوب اسود من الخام
ما ذكر به حي ناجي للاموات
وعزى لمن يرجي عيال بالارحام
المجد ما يوخذ براح وراحات
يوخذ بحزم وعزم واقدام وحسام
من لا يخوض اخطارها بالملمات
يعيش بين اوباش ووهام واحلام
ترى الوكاد الفعل ما به مراوات
اصدق من اللي يكتبونه بالاقلام
الذيب ياهل العرف ما رافق الشات
والنمر ما والف مفاصيل الاروام
علم ظهر للناس ما به مناجات
ومن لا يصلي الخمس يكفر ولو صام
ومن لا يفكر بالامور البعيدات
لازم بحق الناس يخطي بالاحكام
تمشي ليالينا والايام عجلات
والله بما يخفى على العبد علام
راح الصديق اشباح ليل به احلام
يالله يا عالم خفيات الارحام
يا منزل الما من صدوق الغمامي
تفرج لقلب بين لاوي وصرام
ويكويه من لوعات الايام حامي
والعين عن طيب الكرا جفنها شام
ان ناموا المخلوق عيت تنامي
ينام من هو داله القلب مريام
وانا بقلبي جرح والجرح دامي
جرح جرح قلبي صوابه من العام
بين الضلوع بخافق القلب كامي
اخفيت ضره لين بيح بالاجسام
واليوم زاد وشاهدوه الانامي
جرح تبين بالحشا موجع ضام
وصدر تلوعه الهموم الجسامي
وغديت ما بين الحقايق والاوهام
مثل الدريك بصحصح اللال ضامي
هنيت مرتاح بليل الدجى نام
يرقد ويصبح بين امان وسلامي
ماهوب مثلي ينهشه غاسق الهام
زعاف سمه صاطي بالعظامي
اعوم ما بين الليالي والايام
مثل الغريق بمظلمات الجمامي
راح الصديق اشباح ليل به احلام
سراب صحصاح به الزول زامي
واشوف عقب الولف طير الشقا حام
وانا احسبنه قبل هذا قطامي
ابيه بايام الهدد عجل الاولام
لاشك صد وهز ريشه وحامي
الظن خاب وخطوتي بين الاقدام
قصرتها وافكر بحامي وسامي
فكرت وين اهال الدلايل والاعلام
وصديت بافكاري جنوب وشامي
ولا وجدت الا تماثيل واصنام
تخالفت فيها كثير الاسامي
وين الصديق اللي على الكود جزام
الليث بواج الخطر بالظلامي
على الفضيلة يبدل المشى درهام
وعن الرذيله ينحرف بانهزامي
مشيه على الطولات بالعزم قدام
ودايم على ساقة رفيقه يحامي
عزى لمن فكره تشاتيت واقسام
يومه مثل ليله ظلام وكتامي
ان ضاقت الدنيا على كل ضرغام
الله لها عند اكتراب الحزامي
اللي بما يخفى على العبد علام
بحبل الرجابه مقضبي واعتصامي
يعطيك العافيه اخوي صبر
مختارات جميله
وناديت من حولي
هذه القصيدة رد الشاعر الامير / محمد الاحمد السديري على قصيدة مرشد البذال
يقول من هو ناوي يتبع القاف
طار عليه يصرف الشعر تصريف
ما عن في قلبه هوى سمر الاغداف
نجل العيون مخضبات الاطاريف
قلته وانا من بين وديان الاشراف
بالمرتفع بين الجبال المقانيف
جسمي بها كنه على جال ميهاف
وهاجوس قلبي ناحر يمة السيف
البارحه جفني لحلو الكرى عاف
يوم النعايم فوق راسي مشاريف
تسابقن قلبي هواجيس ارداف
الليل طال وحن قلبي على الكيف
وناديت من حولي يعجل بالاسعاف
يشب نار ادلال بيض مزاهيف
يا حسين شب النار واسرف بها اسراف
حتى يصير الجمر فيها مشانيف
ومن حب خولان الخضر هاته اجزاف
واحمس ونسفها على الجمر تنسيف
ودقه بنجر تالي الليل رجاف
ويا حسين لقمها ببيض مهاديف
ومن هيل دار الهند زود لها سناف
وزله وخل الكيف يذرف مع الليف
كنه بوسط الصين مرجان وارعاف
او دم جوف اللي تقود المخاشيف
وعطنيه يا تابع هوا كل غرياف
لو أن حره فوق قلبي مراضيف
اغدي هموم القلب تنوي بالانكاف
ويقفن عن قلبي خفاف محاريف
جاني بيوت ما بها عيب وانضاف
فيهن من الطيب بلاغه وتعريف
يذكر علوم جابها كل خفخاف
بالكذب زاد وهرجهم بالغطاريف
مجمعين الكذب بالهرج زهاف
مثل الرقيعيات دايم خواطيف
اثر العلوم ضعاف وعلومها ضعاف
وافواههم للشين دايم غواريف
احد على درب الردا يهرف اهراف
واحد على العليا يعد المشاريف
واحد عليه السو يا رشد لحاف
وجهك عليه البيض توضي مكاشيف
انا بفضل منزل ايات الاحقاف
لاج بضله عن هبوب العواصيف
ايضا وانا من قول من كان ما خاف
ارقد بامان الله ولو ما معي سيف
الناس يا مرشد بالايام بخلاف
وانا ومثلك للفضيله مواليف
قم يا محيسن
قم يا محيسن شب نار المعاميل
وصفصف عليها السمر من زين الاخشاب
ان ولعت واستضرمت باللهب حيل
يجذب سناها بالدجى كل شراب
وان صرمت والجمر فيها دحاميل
أزرق سناها ذايب يلهب الهاب
احمس عليها البن من غير تقليل
واحذر عواقب من هرج عايب عاب
ودقه ولقمها وزود لها الهيل
حتى يصير الكيف طب للألباب
ماها قراح صافي من شهاليل
من وبل رايح داجي الغيث نحاب
يا حلو صبتها ببعض الفناجيل
ان ذاقها الممروض من علته طاب
يالخالدي يطري على التعاليل
يوم الرقيب معلق تقل مشهاب
يوم الكواكب مثل لون المشاعيل
وعنا ردي الخال يالحيدري غاب
جانا من العارض كلام بتفصيل
من واحد يشكي من الناس عجاب
يشكي هوا راع العيون المظاليل
وقبله عقاب الخيل يشكي على حجاب
ماجور يا شاكي هو انافل الجيل
الله يفكك من عنا عكش الاهداب
الطير يشبك بالشرك مثل ما قيل
والصيد يشرف طارده كل مرقاب
اتعب وعد بنا يفات الاقاويل
ويبين لك بصخيف الوسط مضراب
حرك قدم رجلك إلى هود الليل
ومن بعد الملقاف في بندقه صاب
بلكي ياخو ناصر تحصل محاصيل
تصادف الغرات تفتح بها ابواب
معهن لمن عناك تلقى محاويل
ويبهج فوادك طقة الناب بالناب
تشم بين اشفاه بيض معاسيل
يكسر عليها عابد وسط محراب
بيض يشادن قحويان الغراميل
فيهن دواك وداك يا زاك الانساب
ياما من الخفرات ذقنا الغرابيل
وياما عديت الين عرش القدم عاب
وياما زعجت الويل والحقته الويل
وياما دخلت بحور لجات وغباب
وياما سطابي بالهوا ضاهد الشيل
وياما عسفت من العماهيج الاصعاب
وياما تلوينا بشقر عشاكيل
ايضاً ولا اخشى الناب من غاسق الداب
اركض لهن لو هن صعاب المناويل
وعلى من سمر الحناديس جلباب
اتبع هواجماً تقود المغازيل
مع صحصح نشرب هواكل خنياب
عيني تعرف الزين بين الازوايل
وقلبي من الرثم الخراعيب مرعاب
أرى الدار
ارى الدار عقب الضاعنين خراب
ولا شوف فيها من يرد جواب
سكانها يا سيف عنها تقللوا
زالوا كما زال السراب ضباب
شالتهم الايام واقفت ضعونهم
وساقوا كما ساق الشمال سحاب
ضعاين قفت بحي نوده
وشالت لنا فوق الحنايا احباب
واقول والعبرات مني سوابح
فرقا الاحبه للفواد عذاب
ولابي ولا شيء يلوج بخاطري
سوى عندل منها شبابي شاب
صافيتها والعمر في عنفوانه
وصارت على الهينات صعاب
وخاطرت بالنفس العزيزه بحبها
اكابد مغاليل على غضاب
وين الذي يا سيف وان بان وجهه
سنا الشمس عن كل العباد يغاب
وين الذي يا سيف وان جاني الظلما
لقيت من بين شفتيه شراب
وين الذي يا سيف مكن صوابي
وانا فيه زودت الصواب صواب
وين الذي يا سيف فضله علينا
حسانيه والله ما لهن حساب
وين الذي يا سيف وان شفت ريبه
احطه على الصدر المريض حجاب
وين الذي يا سيف وان حل دارنا
تبدل من عقب المحول خصاب
وين الذي يا سيف ظيمه يظيمني
واطيب وان قفا عناه وطاب
وين الذي يا سيف اشاكيه ودي
ومن بيننا حب الموده ذاب
وين الذي يا سيف ما ديس عرضه
وعن كل منقود يقال يهاب
وين الذي يا سيف ما شفت مثله
مع الناس ما دام الغراب غراب
وين الذي ما شيف مثله ولا مشي
على الأرض مادام التراب تراب
عنود المها جدد غرامي واجادني
وله بين محني الضلوع صواب
هواياه ما بين الضماير تمكنت
وذوي القلب من جرح الغرام وذاب
ترى الحب بالعشاق حمر طعونه
مضارب سيوف يقتفيها حراب
قولو لخو صنعا شكالك مولع
هوى جادل راحت عليه ذهاب
راحت فوات الحرص من غير مقصد
امور لهن بالكاينات حساب
لا طارش جاني يودي رسالتي
ايضاً ولا مها قريت كتاب
يا زبن ابشكي لك هوى ضامر الحشا
اغديك تفتح لي عليه ابواب
إلى فعلت الخير تحمد فعايلك
وينو لك من الرب الكريم ثواب
وحمل خفوق الطير مني رساله
إلى غالي دونه يحول سراب
اعرج على داره واقبل رسومها
ولا اشوف فيها من يرد جواب
انادم اللي رفقته ترفع الراس
ان جا ينادمني وضيع من الناس
صديت عنه وقلت منتب نديمي
ماهوب كبر وكل ناس لها اجناس
وعندي عزيز النفس دايم حشيمي
للكبر والله ما توشحت بلباس
بكتب التواضع ناجح بتعليمي
انادم اللي رفقته ترفع الرأس
وياقف معي دايم بوجه الخصيمي
ان كبرت القاله والارياق يباس
يظيم عدوانه ولا يستظيمي
وعندي ليا شفت المناعير جلاس
انا لهم بايات فكري كليمي
ولا قارب الخايب ولا كل بلاس
اللي على نقل النمايم فهيمي
نشدتني تقول بالقلب هوجاس
قلت أي نعم ما فيه حي سليمي
يابو محمد كن ما عندي اوناس
اليا خفق فكري بشيء عظيمي
اغيب كني وسط ظلمات الادماس
واناجي الرب العظيم الكريمي
اناجي الخلاق قطاف الانفاس
الواحد اللي فوق عرشه مقيمي
عز الله اني بالهواجيس غطاس
وعزي لمن هو في بحرهن يهيمي
يا بندر الجبرين يا معرب الساس
اخلصت لك حيثك نديم حليمي
العالم الله ما هرجنا بالادناس
والله بما يخفي فهيم حكيمي
ولادن في جلساتنا حافة الكاس
ولا نخوض بكل هرج ذميمي
واللي نوده قطعت عنه الارماس
ذكراه مثل احلام ليل بهيمي
وقت النضا قفا وقفن الافراس
وحتى زهور الورد صارت هشيمي
والنمر مخلد عقب ما هوب فراس
والبوم عقب الذل صبح عديمي
وديك الدجاج معلق فيه الاجراس
والصقر في صكات وقته سقيمي
وابو حقب حصل بالايام موماس
دن بها الدنيا مقيم مديمي
كم اوحد في لجة العيب غطاس
يفوت عمره في ظلاله بهيمي
من الذهب لو هو خزن طرم الاكياس
جن من كريم وحرم منها اليتيمي
يا ناشد العراف
عقب النداوي صار طير الزحم باز
واستفرس الفيوم واستذيب النيص
وقمنا نشوف الحيف بالفرد وجواز
من اسفل النقره إلى وادي العيص
حطولهم مع سلم الغدر منقاز
والعدل ما تلقاه ناس مناقيص
خلط الحلال بنية البغي ما جاز
ولا ينبني مجد بعوج المخاليص
يا ناشد العراف بارقام والغاز
اعطيك عن بعض المخاليق تبخيص
اهل الردا يسقونك الصبر بالقاز
لو انت جار عندهم قدرك أرخيص
الجار ياطونة على غير ما جاز
وطي الحوافر يقتفيها مفاريص
وإلى رخص سعرك مع الربع تمتاز
وإلى على سعرك يبيعونك ارخيص
عدوهم عن شرهم وسط الاحراز
وعلى الصديق ابورد ون المشاقيص
هبيت يا طير على الصيد ما هاز
وفي حلة البحيران يلقي مقانيص
دار لنا
دار لنا ما بين صاره والانفاد
عسى عليها الوسم يمطر حقوقه
عسى يسقيها من الغيث رعاد
مزن من المنشا تلاعج بروقه
تسوقه الشرقي على دار الاجواد
وغربي هواه بجود ربي يسوقه
ربرب طهاه وما طره بالمهل جاد
وسكر هواه وصب صافي صدوقه
له بالخريف وباول الوسم ميعاد
ويتليه من دهم المخايل رفوقه
عقبه تهنا بالروا كل وراد
مثل البطاط ان شرعت فيه نوقه
ويضفي على نجد الوفا دار الامجاد
اللي بها المضيوم ياخذ حقوقه
والعشب غطا باذره كل الاوهاد
من دافق الرايح تسابق عنوقه
يا حلو لجات الزهر وسط الاجراد
ان ذعذع النسناس مالت عذوقه
فقعه مصاليع على روس الاشهاد
والوبل من غر الروايح غبوقه
تسابقوا عشبه مصلحة الاذواد
واهل الغنم كل يرتع فروقه
يفرح بشوفة زاهره كل وراد
ويلقي الزبيدي ظاهر من فتوقه
يالله ياللي له هل الدين سجاد
يا منجين ذا النون والجم فوقه
يا ناصر طه بعد حرب وجهاد
وفي بدر طير السو قصت سبوقه
ومبري مرض ايوب من عقب ما كاد
ومحيي النبات بكوثر من عروقه
تقبل دعات اللي عن الحق ما صاد
والسنة الغرا مسيره وسوقه
يا سيفنا القطاع
بالنصر ياليث المناعير اهنيك
يا منجي الغرقان من بحر الادراك
يا سيفنا القطاع باسماك اناديك
ثلاثة اعوام على الضد أنا أنخاك
عز الله انا عارفين مراميك
حمر بعد وانك مضاريب يمناك
ترى مريض اعلقل حي يناحيك
اسمه هفا واسمك تعلا بالافلاك
الخير كله ثابت في نواصيك
ومن خلقتك ربك على الرشد يقداك
على الفضيلة سامك العرش هاديك
وعن الرذيله مقفيات مطاياك
باروا حنايا معرب الأصل نفديك
حق علينا يا شقر الريش نجزاك
نجزاك بالبيضا ليا حل طاريك
وتنعاف يا فيصل حياة بلياك
انت العديم اللي بعاد معاديك
في هدتك تشبع طيور ترجاك
كبير عدوانك عنالك يرضيك
عقب الهدير اقبل يبي منك حسناك
ان كان هو شره يصدك وناويك
حبلت له وادخلت رأسه بالاشراك
اضحكت شعب يرجى الله ويرجيك
وبكيت عدوانك وهذي سواياك
انت الذي تسهر عدوك مساريك
وانت الذي تتعب بدربك سباياك
حاضرك يشهد لك بما قال ماضيك
وماضيك تاريخ يصور سجاياك
اضرب على الكايد ولاني بناهيك
وسجل عظيمات العظايم بدنياك
تاريخ ابيض ما جرى فيه تشكيك
وعين الآله مدبر الكون ترعاك
عسى دليل الرشد ديام يباريك
ومنين ما وجهت يمشي ممشاك
فات الشباب ولا بقى فيه لذات
قالوا بقلبك يابن بدران صدمات
قلت إي نعم دار بها قبل تدرون
قالوا علامك قلت شي مضى فات
شي يشيب من بالارحام مكنون
هم من اسبابه تجرعت عبرات
يخج قلبي منه ونات وطعون
كم قلت للعزال بالهون هيهات
ما ينعزل قلب بلا ذنب مسجون
نفس على كسب الفضائل مضرات
تشوم للعليا ولا تقبل الهون
تمضي ليالينا والايام عجلات
ويبقى بدنيا الكون من دبر الكون
قولوا لابو فيصل ترى العز سكرات
وفاقات فيها تبعث اللي يموتون
حمله كبير كبر رضوى وابانات
واجا وسلمى يبحل اللي يعرفون
فعله بها الدنيا يسجل بصفحات
يقرا بها أجيال بعدنا يحلون
يا عزنا يا ذخرنا بالملمات
زرق المعارف خلهم عنك ينحون
يا بدرنا يا ظلنا بالمهمات
حتى مراقبة الفلك لك يحسبون
لا تترك أيامك بفغلات وسكات
خطب وراه الحزم والعزم مامون
اكفخ بجنحان السعد كل الأوقات
واسلك ابدرب ما به الناس يمشون
فات الشباب ولا بقى فيه لذات
واليوم خط بصفحة المجد قانون
ابذل وسيد النسا راع المروات
ولا ينفعك مال إلى مت مخزون
ابعد عن اللي ما يعرف الجمالات
دايم وهو باعراض الاجواد مفتون
وياك تنسى بالليالي الشديدات
ربع على القاسين يامير يقسون
للطيب حط بهامة المجد رايات
فيها مضيعة البصاير يدلون
راياتك البيضا تسجل بها آيات
تبقى ولو كل المخاليق يفنون
ايات عدل واضحات رفيعات
شعبك تحتها دايم يستظلون
سجل بتاريخك فعول عظيمات
منها صناديد البشر يستفيدون
للجود في صفحات وجهك علامات
ويحماك رب عز موسى وهارون
يا فزعة المظيوم
يا مرحبا حييت يا عز الاقراب
واهلا بشوفك يا بعد كل غايب
اهلا عدد ما بان نجم وما غاب
وعداد ما تذرى نسيم الهبايب
يالليث يا بن الليث يا زاكي الانساب
حلال عسرات الامور الصعايب
يا فزعة لمظيوم ان كلح الناب
يالظاري الصاطي عطيب الضرايب
يا بن العديم اللي غلب كل غلاب
يا خو الشجاع اللي يحل النشايب
يالنادر اللي من قنص فيك ما خاب
خطك طويل الياهبا كل هايب
يالوايلي يالتغلبي عز الاصحاب
ما ذكر فيكم ها في الاصل عايب
يالفيصلي يا ستر غضات الاشناب
ان نابهن في بعض الأيام نايب
ياللي لهن في ساعة الضيق جلباب
ستر لهن عن حاميات اللهايب
ياللي معاديكم على دار الاجناب
تشهد لكم قب الرمك والنجايب
ياللي لكم في منبر المجد محراب
نلتوه من عقب الكدر والمصايب
نلتو رفيع المجد بسيوف وحراب
وعدو انكم شافوا كثيرا الغلايب
بحزم ولطم فيه تقطيع الارقاب
وعزم جلاميد الصخر منه ذايب
وحرب مرير فيه تفتيل الاشناب
يقلب شعر راس الولد منه شايب
بعج ودخان تقاذفه الاطواب
مثل الرعد من مرزمات السحايب
والخيل تشكي صابها ذعر وهياب
وقلوب اهلها ما تمل الحرايب
يحدونها للموت لكد بالاعقاب
والخيل من ضرب المشوك حطايب
تقلى ضاديد المطاليق هراب
من لابة بالفعل سوو عجايب
بارماح بظهور المناعير نشاب
شلف مضاربها تفج الترايب
يشهد لهم بالطيب من وسط الاصلاب
والحي واللي حدر عوج النصايب
صفوة هل العوجا مهدين الاصعاب
تارد حياض الموت ورد الجلايب
يقودها فيصل وللخصم ضراب
بكف مضريها لجدع الضرايب
مفراص ماص للصعيبات عضاب
خلا خصيمه ضانع الفكر خايب
خلاه يشكي لدغة الناب بالداب
سم زعاف ماضي الفعل صايب
ناب صوابه ما تداويه الاطباب
من ناش ما قالو من السم طايب
اركي على كبده من الغبن مشهاب
وخلاه يجرع علقم الشرى رايب
فيصل لدين الله غدا ستر وحجاب
ولولاه راحو بالجزيرة نهايب
ناس تطيع ابليس في كل ما جاب
وعلى الشريعه من كبار العقايب
دجالة بالمكر والكذب نصاب
على الردي تمشي لعوج الطلايب
للملحدين كلاب واصحاب واذناب
عدوان من جاوب على ايوب تايب
تمت وصلى الله على سيد الاحباب
واهلا بشوفك يا بعد كل غايب
كم واحد ٍ له غاية ٍ ما هرجها
كم واحد ٍ له غاية ٍ ما هرجها
كنها لو هو للأدنين محتاج
يخاف من عوجا طوال عوجها
هرجت قفا يركض بها كل هراج
اصبر على ضيم الليالي ونكدها
اصبر على ضيم الليالي ونكدها
وناجي القلب بالفواد عليل
على اي درب يالنديم تدلني
واظنك على عسر الدروب دليل
حملي ثقيل
حملي ثقيل وشايله بحتمالي
واصبر على مر الليالي والأتعاس
وارسي كما ترس رواس الجبالي
ولا يشتكي ضلع عليه القدم داس
وحيد
قالوا: وحيد وقلت: ما عندي أوناس
قالوا: غريب وقلت: بأرضٍ بعيده
أبعدت مابي شوف ناس ٍ من الناس
أبعدت عن بعض الملا وتعديده
مطاوع ٍ قلبي على كل الأجناس
والبعد عن شوف المكاره يفيده
اخترت بعد الدار عن قرب الأنجاس
عن دارهم نلقى ديار ٍ جديده
الله من هم بروحي سهجها
الله من هم بروحي سهجها
بخا في ضميري في كنين الحشا لاج
احر من نار تواقد وهجها
منها خطر روحي على سلك ديباج
عين عسى المولى يعجل فرجها
يفوح ناظرها كما عين هداج
استرسلت للدمع مما رهجها
غيظ يكظ عبارها مثل الامواج
كم واحد له غاية ماهرجها
ويكنها لو هو للادنين محتاج
يخاف من عوجا طوال عوجها
هرجت قفا يركض بها كل هراج
يقضب عليك المخطية من حججها
حلو نباه وقلبه ابيض من الصاج
الله خلق دنيا وساع فججها
وعن ما يريب القلب لك كم منهاج
والرجل وان شطت لياليك سجها
عسى تواليها تبشر بالافراج
يامرحبا يلي على البعد ناديت
يامرحبا يلي على البعد ناديت
ومية هلا مني ولخرى قفتها
جاوبت بأسماك العزيزه ولبيت
روحي وروحك بالهوى رايمتها
انا الذي لك بالموده تلاجيت
روحن تبي روحن وهي مالكتها
تفتحن زهور قلبي وهليت
وعيني تراعي عشقة عاشقتها
للقلب يا وضاح لانياب تليت
وردون ثوبي عبرتي غرقتها
بسفك الدموع وبالتجلي التلاهيت
فاضت وعبراتن بصدري حدتها
اليا بكت عيني ذكرتك وونيت
ودنياي من فرقاك ضاقت سعتها
وان غبت يا مضنون عيني وصديت
قلت الفراق وغيبتك ما غضبتها
اكره ليا قفيت وافرح ليا جيت
وعندك خبر نفسي تعرف شفقتها
ياما لشوفك يا حبيبي تعنيت
وكم خطوة للقاك رجلي خطتها
ان شفت غيرك صدت النفس واغضيت
وناسن تبي لاماي غيره عصتها
حبك بقلبي هزني واستخفيت
وجنات عطفك فرحتي غاليتها
انا على ذكراك عشت وتغذيت
وهواجسي فرحاتنا ما نستها
اقسمت لك بالي فرض حجة البيت
ان العهود سنيننا ما خلفتها
ليتك يابو تركي بعينك تحليت
شقرا القرون انامله ناقضتها
روحي معه تقعد ليا غبت وابطيت
وروحه على ماتشتهي عاشرتها
سيل حدر مع وادي غير واديه
شـي بقلبي ياملا حاير فيه
شي تحير به العقول الفهامي
اخفيه بفوادي ولا ودي ابديه
وادور الخيرات شرق وشامي
احترت به ماشفت شي يحاليه
واليوم ابنشد عنه مانيب كامي
سيل حدر مع وادي غير واديه
مدري حلال ماه والا حرامي
كانه حلال وجايز شرب صافيه
وش حلله يا مفسرين الحلامي
هاتو تفاصيله وهاتو معانيه
نبي الدليل اللي عليه الكلامي
نبي دليل يفهم الدرب ماشيه
يمشي به التايه بليل ظلامي
يمشي به التايه ويقدي مواطيه
ويشرب قراح الما اليا صار ضامي
لاشك هجسي يوم خلا مماشيه
انه حرام ومنه زود الاثامي
احرم من الزقوم مره وحاليه
وشربه على الظامي يزيد الهيامي
الله مـن قلب همومه تقزيه
تدك به مثل الجراد التهامي
من مما جرا قامت تتله مشاحيه
تل الرشا من فوق هدف المقامي!
روابع قامت تصيبه وتخطيه
شاف الهوايل واختلاف الاسامي
ما يسمع الداعي اليا قام يدعيه
يعوم في بحر من الهم طامي
ما ينتبه للي بصوته يناديه
يزيد همه يوم كل ينامي
يشوف وقت ماعرفنا تواليه
وقت يشيَب من بسن الفطامي!
هـذا زمـان كاثرات بلاويه
والغيم يقلب فيه عج وكتامي
يابعد شرب الما على كبد راجيه
ما سيَل الغبرا زعوج الجهامي
انبيك يامن كلمة الحق ترضيه
اعطيك ما ينفعك وافهم مرامي
قصر يذلك لا تقابل مبانيه
خله عسى شامخ طويله هدامي!
خله عسى ما صاب اغادير يفنيه
يودع منازله الطويله رجامي!
لو زان مدخاله وطالت حواميه
شيَد على الخيبه قليل الرحامي
وحـي يوريك المذله وتغليه
انا اشهد انك ميت القلب عامي
من لايودك لا توده وترجيه
ارفع مقامك ياعزيز المقامي
ارفع مقامك عن عدوك وتوذيه
ويلحقك من تركت رفيقك ملامي
حق الرفيق وواجبه لا تخليه
يلزمك مثل الوالدين الحشامي
اختر عزيز الجار والحق يعطيه
مادك به عرق المذله وطاريه
ومن قارب الاجرب بالامراض يعديه
عداوة تسطي باللحم والعظامي
درب السلامه بينات مماشيه
ودرب العطب يرث عليك اللكامي
ابعد وقلبك نازح البعد يشفيه
وتلقا عن الدار البغيضه مقامي
دار بدار وداعي الذل عاصيه
ولا تقبل الذله نفوس الكرامي
الذل موت حايمات ضواميه
عن مقعد بالذل عينك تراعيه
الموت عند الذل امان وسلامي
يرضى المذله من تردت هقاويه
والذل يجفل منه قلب العصامي
والعبد له رب عن الناس يغنيه
ولولاه ما صاب الهدف كل رامي
الصدر ضاق وحاير الدمع دفاق
الصدر ضاق وحاير والدمع دفاق
من ناظرٍ من جاير الدمع مرهوق
دمعٍ تكبه عين عاشقٍ ومشتاق
ارعد سماها بالغضب وأمطر الموق
إلى سفحٍ من فوق الوجان وانساق
تسيق منه معيله مرتع النوق
ماحدٍ رحمني يوم الاقدام غرراق
من جور عبراتٍ تكسر بصندوق
صدرٍ من الفرقا رمع فيه دقاق
واوجس معاليق الحشا يشعلن فوق
إلى بغيت ادله تذكرت لفراق
طفلٍ على شل المعاليق مطفوق
طفلٍ نفل بالزين شخصات الاعناق
عز الله أنه طالني منه ملحوق
فيما مضى دنياي جتلي بالأوفاق
وردت عدٍ قبل ماهو مطروق
جيت الحبيب داله بالكرى راق
ومجوهرات مبيسمه ذقتهن ذوق
يوم أنتبه لي صاحبي عقب مافق
دلى يعاتبني على الغدر والبوق
يقول مامثلك للأ جواد سراق
ولا انتب على هذا من الناس مسبوق
قلت اعذرو من زاركم ما له ارفاق
وروس الافاعي بالقدم حطهن سوق
ماله صديقٍ وبه يضيعن الافاق
وليا جفيته مايبي كل مخلوق
واسفر حجاجه وابدل الوجه باشراق
وافتر عن بيض تكاشف بها بروق
منهن سقاني كأس خمرٍ بترياق
زود على مافات بالغدر مسروق
احباب الاحباب تعاطوا بالارياق
وارواح تحيا بين عاشق ومعشوق
هو حط ذرعانه لي فراش وارواق
وأنا لويت العضد لمعنقه طوق
عليه من شقر العكاريش دلاق
تزها لجسم فارع الطول ممشوق
ثوبه نظيفٍ ولا وطا فيه عشاق
وثوب الخنا يجوزبه كل منطوق
في منامي زارني طيف الحبيب
في منامي زارني طيف الحبيب
قلت له يامرحبا وش ها لبطا
الجفايا ياصاحبي منكم غريب
وانت ماعودتني كثر الخطا
ليه تنسى الحب يالغض الرطيب
ليه تنسى نومنا تحت الغطا
حبكم وسط الحشا جرحه عطيب
في ضميري يابعد روحي سطا
من جميع الخلق ما غيرك قريب
من مشى تحت السما فوق الوطا
ياطبيب الروح ماغيرك طبيب
بالرضا عودتني زين العطا
جض قلبي في الحشا عقب اللهيب
من فرقاك مثل ماجض القطا
انا من نجد يكفيني هواها
أنا من نجد يكفيني هواها
ويبري لوعتي شربي لماها
وشوفي من نبيه ومن نوده
غزال تابع قلبي هواها
غزال ضيعت عقلي وروحي
رمت قلبي وقلبي مارماها
لها بالروح وفؤادي مودة
ولاشىء من احوالي خفاها
تعرف أني لها مملوك طايع
أبيع الروح في دورة رضاها
أهيم بحبها واخفي جروحي
وقلبي ماعشق زول سواها
توقد حبها باقصى فؤادي
ونار الحب يحرقني لظاها
ملكني بالهوا عذب السجايا
ولااذكر ساعة قلبي نساها
نحيل الخصر وضاح الثنايا
نظيم الدر منظوم بفاها
فجعني بالهوا ورقا حمامة
وعيني منه جاها ماكفاها
ورا دنياي عقبه لوعتني
من الفرقا تكر لي صفاها
غنيت ما قصدي طرب
غنيت ما قصدي طرب في حياتي
لاشك في دورات الأيام غنيت
وجاوب ورق الراعبي عن سكاتي
غنا وانا غنيت مثله وونيت
نشدتني عن حالتي يا شفاتي
وأنا مريض القلب لو أني اخفيت
اضحك وونات الحشا موجعاتي
واشرب قراح وكن شربي من الزيت
وبالعين يا خالد نشوف الجناتي
يا عز راسي شفت الاجرام واغضيت
واغيب كني محرمن بالصلاتي
لو هو ندهني رافع الصوت ما اوحيت
محدن يعرف جروحي الخافياتي
واليا نشدني واحدن عنه صديت
اصد وابغض ناقلين الوشاتي
واناجي اللي ما لغيره ترجيت
ما اظن به حي يسوي سواتي
وحيد بالدنيا وأصارع عفاريت
واذكر دروب ايامنا الماضياتي
والحقت مع عبرات صدري تناهيت
ياكثر ما شفنا من العايباتي
واليا زعلت من الخطا قالوا اخطيت
وطاحت عن الكتفين مجة عباتي
وحلقت بالأفكار ثم استجليت
وفكرت في شىء جرا لي وفاتي
حيفٍ يفتت بسرة القلب تفتيت
من جور هوله زلزل الراسياتي
يميت حي وباللحد يزعل الميت
ويشيب طفل ويذهل المرضعاتي
ينسن رضيع الديد صرعا مباهيت
وانا برجوى مجري الكايناتي
وكبرت باسماه العزيزه ولبيت
اللي عصم يوسف عن الخايناتي
ورده على يعقوب عقب التفاخيت
كلن يقول انه بفعله زناتي
والفعل راحوبه هل المجد والصيت
ما ريد دار الذل دار العصاتي
دار الخنا والغدر منها استخليت
متى عليها نسمع النايحاتي
ودار الثنا والجود فيها زغاريت
يـالله يللي تعلم الخافياتي
انك تمسيها على ما تمنيت
لولاه ما روضت نفسي
لولا الرجا و أعلل القلب بوعود
بوعود خل صار شوفه شفاقه
لولاه ماروضت نفسي على الكود
ومن كل خلق الله عشقته عشاقه
اختار قلبي بالهوا ناعم العود
ما غيره أحد بالمخاليق شاقه
طفل عليه من البها ستر و عقود
زين القوام اشباه وجهه دقاقة
ان كان شفته فتح القلب بورود
و ان غاب دايم دمعتي من فراقه
طفل سحرها روت بشفاه منضود
اللي نهب مكنون قلبي سراقه
مادام هو ماجود فالحب ماجود
وسط الضماير مبهمات حلاقه
يا ناس أنا أحبه ولا فيه منقود
وقلبي لغيره ما يعرف الصداقه
يا ناس حبي له بلا سلم و حدود
و فراق روحي من سبايب فراقه
يافيصل اودعك توديع من غاب
اشوف ديّاني وقف لي على الباب
يبغى الوفا مني ويبغى حسابه
ماينسى دين تقفاه طلاب
والدين مايوفيه كثر الطلابه
يافيصل اودعك توديع من غاب
لاترتجيه انه يجي من غيابه
غيبة دهر ماهوب شهر عد وحساب
في مظلم ينهد فوقي ترابه
اوصيك يافيصل تخير بالأنساب
كل تعوض فيه كون النسابه
طيرك غدا بالصيف شاف التناكير
طيرك غدا بالصيف شاف التناكير
حدنه العقبان لين اقلعنه
والطير وقت القيض شربلاخير
تتعب وكل ايديك مايشبعنه
عندي عوض طيرك ليال المخاظير
فـرخ قرانيس الهوا علمنه
تحير في وصفه جميع الصقاقير
نضمن عيونه سود بحجورهنه
اشقر عديم ينثر الريش تنثير
وايديه شكاة الغلب ينثرنه
وان صرة قدام السلف والمظاهير
بامخافق الاجوال يعجبك فنه
طيريعوضك ياصبي المخاسير
وخل الصياح اونة الصدر كنه
قبلك بكينا الطير ويا الغنادير
قد عذبن القلب ثم اوجعنه
مررت للسلام والتحية .
يسعد اوقاتكم ..