من الشعر النبطي....عساها ترضي ذائقتكم الشعريه

السلام عليكم ورحمة وبركاته....
صباحكم خير


حبيت أشاركم بأروع ماسمعت من الشعر النبطي....عساها ترضي ذائقتكم الشعريه.....مثل ما أرضتني جدا....رغم ذوقي الإنتقائي بالشعر.....


ياالظما ..ماوردتك عن قناعه ...
وانت مالك أمان .. ولاشريعه...
مااكذب من السراب إلا اتّباعه ...
ولا اصعب من الفراق إلا ..القطيعه...
مامضى مِنكْ ياصعب .. انتزاعه ...
من جروح ٍ تموت .. ولاتذيعه...
بين رغبة حضورك .. وامتناعه ..
جيت اجامل "غيابك" في صنيعه !!!!...
وشاعرك .. لا تناسى ..ياضياعه ...
كن طيفك - محرّم - مايطيعه....

الشاعر خميس الأسلمي

مري شمال ان كان ودك تمرين ....
مري على قبري وشوفي محله ...
وان كان ودك فوق قبري تصلين ....
ليا سجدتي فلي الراس كله ...
اشم ريحه مثل ورد البساتين ...
وجسم كلاه الدود وصلك يبله ....
وعند الوداع اكتبي على القبر حرفين ....
مرحوم يا الي صاحبه ما حصل له .....


تعال لملمني من اقصاي لا هنت ...
واجمع شتاتي في اليدين العرايا ....
شف حالتي من جمرة الشوق ما نمت ...
ارقب صباحاتك تزف الهدايا ....
وتكشف اوراقك وتخرج عن الصمت ...
وتشوف حبي من جميع الزوايا ....

للمبدع عبدالله الطفيلي

صاحبي لادارت الايّام واضناك الفراق ...
واستباحك كل جرح وصار لك مثل الخوي...
اذكر اللي من فراقك ضاق صدره واستضاق ...
حالته تِشكى وصدره من همومه مرتوي ....
كنّه المسجون ظلم وحِط بيديه الوثاق ...
وصار مجرم في عيون الناس لوانّه سِوي ....
وانت يانبض الخفوق ومنهله عذب المذاق ....
لاتزوّد ضيقة اللي من زمانه منكوي ....

محمد القثامي

ياوجودي وجد عودٍ لاعيال ولاقرابه ...
ماقداه الا يون ويردف الونّه بونّه ....
لالقا فزعة رفيق ولادعاةٍ مستجابه ...
كل ماامساله بظنٍ خيبت الايام ظنّه ...

سلطان بن وسام

اربع تبحث بسدك كل خافي ....
تجتمع وتكمل نصاب المزكي ...
الرفيق السو والخل المجافي ...
والزمان الصلف والحظ المتكي ...


تدري وش اللي يصدم الرجال في بعض اخوياه ....
وجودهم في النايبات الملزمه مثل عدمه ...
وتدري وش اللي يقهر الرجال ويبين خفاه ...
الا بغى المحزم ولا عين ذخاير محزمه ...
من غير ربعٍ ينقلون الحمل جعل امحق حياه ...
امحق حياةٍ توجع الرجال غصب وتلزمه ...


لو كل غالي يجي دايم على ذكره ...
ماصرت اشوفك هناك ، وحبك هنيا ...
ياليتني لا بغيت اكره قدرت اكره ....
ماكان قلبي ليا جيت اكرهك عيا ...


معجزة الشعر"متعب التركي"

الا ياوجودي وجد من شاف مايكره ...
من اعز من يمشي على الارض في باله...
عطاه الحقوق مكمله وآمن مكره ...
وجحد ماعطاه وصد واقفا على ماله ...
وياتل قلبي تل حبل على مكره ...
قطعه المدا وانتل من فوق محاله ...
ويازوع قلبي زوعة الطير من وكره ...
صفق بالجناح وعارض الجول واشفاله ...
ويالجتي لجة ثلاث على بكره ...
عن انضارهن صدوا بها وقت لبهاله ..
على الصاحب اللي ماخذ من الغلا شكره ..
وعلى عرش قلبي بين الاضلاع منزاله ..
له الروح من بد المخاليق محتكره ..
لهم حب في قلبي وهو حبه لحاله ...
لياقلت ابي منك الوفاء قال لي بكره ...
وقفا الزمان وراح والحالة الحاله ...
عقول العرب في واقع الحب مدكره ...
وراعي الهوى كنه لياصد يوما له ...
هل الحب في دنيا المحبين في سكره ....
ولاينس جروح الهوى غير عقاله ...
عسى لايمي تخلف صروف الدهر فكره ...
تجمع عليه هموم وقته وهو داله ...

محمد بن عباد

للصبر حد .. ووحشتك مالها حدود
ياللي غلاك أصبح مع الوقت عاده
أشتاق لك مع سايق النفح والنود
وأوله عليك أكثر .. واحبك زياده



للشاعر / سعود المطيري

كثر ماجيت يمّك مهتوي وارتجيك
كثر ما لمت نفسي يوم تنشد رجاك
ياعسى اللي بلاني بالهوى يبتليك
يمكن تحس في قلبً .. يهمه رضاك



للشاعر / سعود المطيري

لاتعتذر منت بعلى الصد معذور
وش عاد لو كثرت علي المعاذير
تعبت أسايرها وهّديك وتثور
واسووق رجلي في سراب المشاوير
ياصاحبي .. ماني على الصبر مجبور
ولولاك تسوى .. مارقيت المحاذير
يوم الغلا .. جاله على القلب منثور
سقت الثمين ولاحسبت المخاسير




للشاعر / سعود المطيري

بيّض الله وجه الأيام سوتبي جميل
وأرحم الله مابقا منك يالقلب الندي
مانفعني جود يمناي في راس البخيل
ليتني قبل أفعل الطيب مقطوعه يدي
والله اني ماتحريت للوقفه حصيل
بدويً لانخيته من أقصاه يعدي


للشاعر / سعود المطيري

وش يذبح الرجل غير الخوف والحاجه ...
لا صار في موقفن محرج ومحتاجي ...
حتى زمانه عقد له طارف حجاجه ...
لو يعتدل يوم باق العام منعاجي ...
لاشب ناره هواه يطفي سراجه ...
وليا لقا درب مايفرح بمخراجي ...


"مضحي السميري"

الرجل صدره قفل مفتاحه الهرج ..
ينبيك عن غامض سجاياه هرجه ..
مانيب " دواج الهوى " نافض الخرج ..
اللي بدربه للهوى قل خرجه ...
الوقت ياللي تحسبه../ مايل السرج ...
لابد مايطرحك لامال سرجه ...
وترى الهوان إنك تحوّل من البرج ...
والكايد إن الطيب ترقا لبرجه...

"عبدالعزيز السبيل"

نبقى على مر الليالي عزيزين ...
نهج ٍ عزيز وعزة النفس منا ...
ياسيرة ٍ للطيب نبقى وتبقين ...
من جدنا الاول ليآخر زمنا ...


"عبدالله الهديريس"

عزالله أن الطيب كايد ومفقود ...
ولاعاد يلقى له مع الناس شاري ...
أقفت مراكب كاسب الطيب والجود...
والبيت دافنته هبوب الذواري...

"رشيد منور"

حيٍ يورّيك المذلة وتغليه ...
أنا أشهد إنك ميت القلب عامي ...
من لا يوّدك لا توّده وترجيه ...
أرفع مقامك يا عزيز المقامي ...

محمد الأحمد السديري

ليلة مطر ..

ليلة مطر شق الرعد جو الانفاس
وامطر جنون العاصفه من حروفي ....
اعد واذكر ناس .. وانسى بعض ناس
اشباح ذكرى تسكن اطلال شوفي ...
كان الزمان لصادق الحب نبراس
وكان المكان اطهر مكان لوقوفي ...
طفولتي ياحلم ياغربة احساس
يابعد شق بخنجر البعد جوفي ....
اصرخ ولكن تحتضن صوتي اقواس
وجمرة قلم مرتد تشعل كفوفي ...
كل ماتكسر للقلم بيدرالماس
حدر السنابل تورق اغصان خوفي ...
وكل ماخرج من معطف الليل نسناس
احاول اخرج من ثنايا ظروفي ....
واكتب شعر تنزيل من وحي الانفاس
لعلها تقلب حروفي .. حروفي ...




حميدي الثقفي

الصحاري ..


ياصاحبي وقف لزيف الصحاري
وبشر هجير الشمس عن موعد السيل ...
حاول تغير في ملامح نهاري
واعط القمر مفتاح بوابة الليل ...
مدري لشنهو موعدي وانتظاري
مادامت أيامي قليلة محاصيل ...
في داخلي نزعة خفوق انتحاري
حلم تكسر في ثنايا التفاصيل ...
واثر انكسار الحلم يعني انكساري
بغيت اكمل وانكسر فيني الحيل ...








حميدي الثقفي

اسوار الشموس ..

انا ماني بمن يقرا الصور حتى ينام اللون
ولامن يهدم اسوارالشموس ليبني ظلاله ....
انا الليل البهيم اللي خرج من كاحل العرجون
صباح اطراف اصابعكم تنز بطينة اطفاله ...
جنوني حكمتي .. والحكمه اولها صلف بجنون
لذا صوتي رما دلو الكلام وقطّع حباله ...
صحيح النار تاكلني .. ولكني عرفت اشلون
اموت .. وكيف يختال الرماد بعزة اشعاله ...
وداعاً يالسيوف الطاعنه في جثة المطعون
وداعاً يالمرايا .. وجهى اول وآخر اشكاله ...
وداعاً للمكان المستوي فيني وفيه الكون
هلا بك يامكان ٍ قبلي اسمك ماحد ٍ قاله ....
مخاليقه تعيش بدون اساميها عشان آكون
انا اول من يدق طبول عرس الشمس في رماله...







حميدي الثقفي

سندباديـة ..

تعبت اراجيهم بما تخفي الروح
متشردٍ قطاع غور الدم الحار ...
إما مسافر حامل أفكاري جروح
ولا مقيم وحامل جروحي أفكار ....
وتعارضت في سندبادية البوح
كينونة الناسك وبوذية النار ....
السر مسودة تفاصيل مفضوح
والحال تضحك منّه أشباح الأقدار ...
أحكي وكيف أحكي بما تخفي الروح
وانا يدي حمرا بلون الدم الحار ...

حميدي الثقفي

اروى .. وانا جرحي ثمل طين وتراب
قاع ٍ خطب ود الغيوم ونفاها ....
اروى . وتكسر ضحكتي دمعة اسباب
وكم فرحة بعت بكدرها صفاها ...
تبعثرت في ذاكرة صيف كذاب
ادركت باديها ولذت بجفاها ....
كلي رجا .. ومنادمة ليل وعتاب
وجروح تركض عكس نقطة شفاها ..
اغمّض عيوني على برد الاهداب
واتذكر احضان امنحتني دفاها ...
والليل درويش ٍ حمل رفض الابواب
خبل ٍ شرب زيت الشموع وطفاها ...
وانا على جال السهر ظل وكتاب
احاول استرجع لاولى جفاها ...

حميدي الثقفي

من قال مالك شي من فاقد الشي
ماهو صحيح وفاقد الشي يعطيه ...
مثل الشجر يعطي لنا بارد الفي
يعطي الظلال ولاهب القيظ يكويه ...
مثل القمر يعطي لنا برزخ الضي
يعطي الضيا ومايندرى وش يغطيه ...
مثل العذاري تسقي النازح المي
تسقي البعيد ونخلها ماتسقيه ...
مثل الطبيب اللي يداوي عن العي
لكنّ ماهولاقي احدٍ يداويه ...
عطيتك التحنان من خافقٍ حي
يعني عطيتك شي انا منحرم فيه ...
أرويتك ابعضي وانا فاقد الري
مخفي ظماي وقلبي الحزن طاويه ....
لي في عيونك لاح مستقبلٍ جي
حلمٍ بعيد ٍ .. ساهر الليل يرجيه ....


حميدي الثقفي

صاح بي / صاحبي .. والليل عطر الكتابه
كيف نبني وطن للمتعبين اغتراب ....
كيف تطلع يدينك يارفيق الصبابه
وانت للتمر في شفتك طعم الغياب ...
قلت له : ظلك الناضح بريق ومهابه
اطعن الظل واكتب من دماه الجواب ...
من رقى نخلة الدفتر وشق السحابه
تغسله باحتمالات المطر والتراب ...
كلما خدرت صحو السؤال الاجابه
سال قيض تشجر من عروق السحاب ...
فوق نخل جنو طلعه وخانواترابه
وارتدوا فوق ثوب الطين .. طين الثياب ...
صبي الغيم ياسلمى لناس ٍ غلابه
من عطشهم على الما يحلبون السراب ...
اظهري مثل نفحة برق .. والفجر غابه
واختفي مثل ورده في ظنون الكتاب ...
غصنها يعزل الما من سراب التشابه
والنسانيس ترسم به نوافذ .. وباب ...

حميدي الثقفي

مثل المطر ..

حبيبي مانت لي وحدي حبيب ولا حبيب الكل
كثير اللي يحب ويمتلى ويفيض فنجاله ....
دخيلك لاتحاصرني حبيبي بين شمس وظل
انا مثل المطر مثل القدر مثل الشعر حاله ...
انا مثل البحر قالت له امواجه تكلم .. قل
ولاقال البحر كل الكلام اللي على باله ....
انا اللي الف نجم ٍ اهتدابي والف نجم ٍضل
سرى من شرفة الغيم البعيده ينفض ظلاله ...
تقول امي وهبني شعري الخلاق عز وجل
جمعت الها النجوم اف ثوبها وابتلت اسماله ...
احبك .. لاتصيرها على اوراقي سؤال
وحل دخيلك ياحبيبي من جواب الحب وسؤاله ...
اخاف اقولها ويجف ورد ٍ بالظنون ابتل
وانا ماحب اكون الشاعر اللي يبكي اطلاله ....


حميدي الثقفي

لو صرخت ..


لو صرخت. النار لاتحطب ضلوعك
زادها وزنادها مني وفيِّه ...
وان صرخت.. النور لاتوقد شموعك
في عيوني من غبار الشمس فيَّه ...
وان صرخت.. الموت لاتنزف دموعك
مانزف طاهر كما دم الضحيه ....
ليه تبني فوق رعش احلام جوعك
عرش عراف المسافات القصيه ....
وانت دايم سلمك يرقى طلوعك
ماستوى طينك لتوطينك هويه ...
كل منفي داخلك ملفي ربوعك
وانقطاعاتك لطاعاتك عصيه ...
اعص .. ولاّطيع عصيانك بطوعك
لاتطفي جمرة آلما في يديه ...
هاك نار القلب لاتحطب ضلوعك
تحطب ضلوعك ونار القلب حيه ...

حميدي الثقفي

يامحرم على اوراقي حضور القصيده
خيرة الله عليك اطلق رهينة غيابك ....
القوافي غدت مثل الخيول الشريده
وين ماتتجه يتبعن وجهة ركابك ...
واحتبس منك دم المحبره في وريده
شوف.. حتى القلم ماطاق قسوة عذابك ...
كيف اعاتبك كيف اعطيك فرصه جديده
انت شوهت مفهوم العتاب بعتابك ....
كان لي فيك ياماكان هقوه بعيده
يجذبنّي حبال الصيف واتبع سرابك ...
اتعبتني مسافات الدروب العنيده
لازم اسألك واتحمل فجيعة جوابك ....
قول مابيك والفرقا طرقها عديده
كان عندك شجاعة صدق تبرح جنابك ....
خذ معك كل شي غير القلم والقصيده
مالها ذنب تاخذها رهينة غيابك ....




حميدي الثقفي

انا دخيلك ..

دخيل ركض الوجع والآه والضمه
ومتابع الركض .. لاتكّلف على شاني ....
خلاص مني ومنك الحب في الذمه
تضاعفت من جروحك قوة ايماني ....
محسوبك ان جيت وان ماجيت ماهمه
وش ياخذ الدمع من تغميضة اجفاني ....
انام وادخل قميص الليل مع كمه
واخرج صلاة الفجر مع كمه الثاني ....
اتنفس الفجر الاول عاقد الهمه
واركض مع الناس .. والعن خيّر احزاني ....
كرامة النفس عندي فوق في القمه
وتثور من دونها .. ناري ، ودخاني ....
ذبحت خيل الهوى .. واسقيتها دمه
خليتها غصب تحمل جثة ( الجاني ) ...
ياحالمه في دروب العشق مهتمه
عمري مهو لك رصيف احلام واشجاني ....
عمري قصيده ( ردية حال )منسمه
مافيني اوراق يامحبوبة اغصاني....




حميدي الثقفي

رفرفت ..

رفرفت في بالي اوراق بيضا مهمله
واشتهى صمت ابيض الجوع تفاح الكلام ....
مثل طفل ٍ كان يبني ويهدم منزله
في هديل البحر واصطادته موجة حمام ...
جيت لاسهم ٍ تناسى ولاجرح ٍ دله
عن هوى اللي ينزعون الجروح من السهام ....
جيت للدنيا قمر وجه صوتي حنظله
تحت جلدي ذاكرة خبت من رمل ..وعظام ...
لي سما عالي وحفنة سديم و.. وسنبله
سبحت فيها وغنت عصافير الغمام ....
كن من روّع ضبى خبت دمي واجفله
وارتبك في حانة الصيف طاروق الصرام ...
كلما قربت للريح نار ٍمشعله
فوق صدري زادني جمرها برد وسلام ....
كيف خيلت آخر الوقت قاع ٍ ممحله
كيف خيلت آخر القاع وقت ٍ للهدام ....
وش هو آخر دربنا .. آخر الدرب اوله
لاهمزنا مهرة الوقت وانزاح اللثام ....
كل درب ٍ تعرفه حاول انك تجهله
الدروب لصمت وجهي .. مجاهيل وظلام ...


حميدي الثقفي

ظنون الارصفه ..

اذكرومبتل السكوت اطفاك واشعلك الحوار
ليلة شتا فيها تقاسمنا ظنون الأرصفه ....
قلت انك اطول مايسور قامتك ظل الجدار
قلت انك اجمل ماتشوهك الحياة المترفه ...
قلت ان اقوى مانقيضك غير هذا الانكسار
في صوتك الليله ولاهو صوتك اللي بعرفه ...
خابرك تحكي عن خلاص الورد واغصان الحصار
تلمع تلاشي تنبعث من كل شي في اطرفه ....
مسفر قم انفض ثرثرة دفترك عن صمت الغبار
حتى تنامى من فضا الغبشه عصافير احرفه ....
وان كان من غيم الجبل سيلت بالوادي نهار
جب لي معك من سدرة الوادي هديل .. ورفرفه ....
اذكر عن الموتى يجي لاصار للفي انحدار
مع لمة الفيه على بالك كلام تسولفه ....
ماعاد في قلبي تشب لدهشة التخمين نار
صمت المدينه في عيونك ضج رقص وغطرفه ....
اسمع دوي ريح الجبال اللي لها بصدري قرار
يممت لك تيارها يجرفك ولاتجرفه ...
تعبت افتش عن ينابيعي وخطواتي بحار
تعبت افتش عن سما حفنة رمال مجغرفه ...
ماخترت اكون من الهوى .. والنار
والطين اختيار ماخترت الم البحر دمع ٍ في عيوني واذرفه ....
ماخترت اغني موجة الياماااال من لول البحار
لكني اخترتك تقاسمني ( ظنون الأرصفه ) ...


حميدي الثقفي

آه يا قربك ..

آه يا قربك ويا بعد المسافة
اقرب من القرب لكنك بعيد ....
أنت عمر صب في عمري جفافه
نصف نار ونصفه الثاني جليد ...
أنت نهر عندي استودع ضفافه
واعذابي لا افتكرت إني وحيد ....
حزني ابسقف المسا يأخذ كثافه
ويتصاعد صبح دخان وحديد ....
وارتمي بين الحقيقة والخرافة
جوف صدري عذق وضلوعي جريد ...
افتح الدفتر ويصفعني غلافه
ويتساقط كل ما به من قصيد ....
وتختنق دمعه ويسقط حلم تافه
وارجع ارسم اكتب احلم من جديد ....
آه يا قربك ويا بعد المسافة
اقرب من القرب لكنك بعيد ....



حميدي الثقفي

نهاية مطاف ..

بس ماخذت من صمتي نهاية مطاف
دمي أخضر ..ورماي القفا مايصوب ....
ترعد اقلوبهم – لكن مطرها جفاف
وش يميت القلوب الا جفاف القلوب ....
من يصدق ؟ نهر يغتال حلم الضفاف
بين جزر الشمال وبين مد الجنوب ....
ماهقبت أن في عشق الرمال انحراف
لين خانتني الخطوة ..وخنت الدروب ....
بعدها صرت " للصفين" معنى وقاف
وابتسامة على ثغر المواجع تذوب ....
الاماني / سنابل ينتظرها القطاف
والمواسم / تعاني جوع كل الشعوب ....

حميدي الثقفي

يعطيك العافيه اخوي صبر
مقتطفات جميله

اقتباس:

---

المشاركة الأصلية كتبت بواسطة amira

يعطيك العافيه اخوي صبر
مقتطفات جميله

---

:241::241::241:

اختيار رائع
سلمت الانامل