طال انتظاري يا اريش العين وش جاك
تقسى على قلب يحبك ويغليك
ما تدري انه داخل الروح مرساك
وما تدري ان النبض فيني يناديك
وش قيمة الدنيا حبيبي بليّاك
وش موقفي لا ضاق صدري يناجيك
مدمن على حبك وشوفك ولاماك
مقدر على بعدك ولا اقدر اخليك
جيتك وانا في غاية الشوق لرضاك
جيتك وروحي ترتعش بين اياديك
امر.. تدلل.. سم.. كلي انا افداك
افديك بالروح العزيزة انا افديك
اسعد ليالي العمر لا صرت وياك
واسعد ليالي عشتها مع لياليك
ارتاح انا لا شفت طلة محياك
وارتاح لا جابوا مع الناس طاريك
حياتي في فرقاك فوضى وارباك
ما يستقر الحال الا حواليك
اجافي روحي والبرايا ولا جفاك
الموت اهون لي من اني اجافيك
