يوميات عراويه في سوق الخضار عصريه

السلام عليكم ورحمة الله وبركاته

اليوم ناوي اخبص شوي يعني بخلي الكلام على السليقه بس مو تشربونها انتبهوا

يومنني مليت المعده من النعم والحمدلله وانا اتعربش بالعراوي عربشه واني ادق سلف قلت خل اروح

اجيب علف للمعده البشريه واني البس خواجه الفنيله ام كموم وعليها رسمت تسماح مدري وين جت

منه واطق ذيك النظارات اللي مدري وش لونها الى ساعتكم اهم شي اني اكمل الطقم والبس ذاك

التراوزر اللي ذكرني بسراويل خط البلده منذو مبطي واتكشخ واتلمع لينني طلعت الق

واني اقول بسم الله وامسك خط الدايري مدري ليش سموووه دائري مع انه مستطيل تريبعه

بس عدووها

متوجه لسوق الخضره في عتيقه



واول من يقابلنا ذاك الورع ابوطاقيه ماشي طبلونه تقول رصاصة

عبررود وووووووزززززززززززززززز قلنا الله يستر علينا اولها عبرود ياخوفي اخره تكون شوزن

ونسايس الشارع مسايس لين وصلنا افتراق الطرق اللي يوديك لطريق الملك فهد والا اللي يبتلبك على طول

واذا السيارات متشاده بالشعر اللي يبي يسار ماسكن يمين والا يبي يبتل ماسكن يسار

ولهذا وصفنا بااننا شعوبا متحضره جدا جدا وانا اسبر من بعيد وانا القالي ذيك الفرجه للعراوي واجيك وزززززززز

معها واذا انا خارج من المعمعه بااصابه بسيطه للعراوي ماراح منها الا مراية السواق بس

قلت الحمدلله الذي اخرجنا منها سالمين قلت بس خل اعجل شوي عشان الحق على السوق لايصكون قبل المغرب

واذا ذيك السياره اللي وراي ويولع انواره قلت بس هذولا حقين الطواقي خل نؤخر عنه عشان يروح ونفتك من

شره وانا ارعص البنزين الى ان وصل عداد السرعه 130 واخذ يمين ابيه يذلف طلع حقين البوليس المتخفين

وهو يقول اسفط ياراع الروز وانا انبسط من المدحه وانا اتشجنجع واسفط واحط يديني على الطاره تقول سواق

ستاوي

وللامانه رجال المرور اللي يقال عنهم سريين الغالب فيهم محترمين ومحترفين جدا

نزل ابن الحلال وجاني واذا انا حاط يديني على الدرنكوووووووس قال وش بلاك قلت مثل ذولاك الحمران العطران

لازم اتبع النظام قالي ذاك عنهم هنا حرك يديك ورجليك وخل عنك بس وعطنا الاستماره والرخصه قلت غالي

والطلب رخيص سم هذي تابعية الموتر وتابعية السواق ؟؟؟؟؟

وهو يصخني بذاك السعال وراك مسرع قلت مااسرعت قال الا مسرع انت ماشي 130 والمسموح 115

قالو يعني حقانين 115 مدري وين جابها منه قلت اولا مكتوب على اللوحه اللي قدامنا السرعه المسموح بها 120

وهو يطلق علي ذاك الصاروخ سكود قال خبرك عتيق قلتله ايوالله انا رايح عتيقه وهو ينفش ريشه تقول ديكن

مهايطي وينتفخ لين بغى ينفجر من الغيظ قلتله يركدون السرعه حقيقه بسببك انت حسبتك من الارهابيين حقين

الطواقي قلت خل اوخر عنك وافتك من شرك طلع الخطاء عليك ليش تسوي مثلهم

وهو يصخني بالسعال الثاني يقولي ورى تابعية العراوي مطوفه 3 سنين وانا اعطيه الاجابه الدامغه قلتله وبكل

البراءه جزاك الله خير اللي نبهتني عنها لانكم من عصر جدي مااحد شيك على اوراق المواتر مع انكم بالقراءه فلته

هذي قلتها بسري

المهم بعد اخذ ورد معه طلع الحق علي لاني ماافرق بين ذاك وذاك ولاني دبلوماسي وعلى سليقتي خقيت بالصدق

على طول المهم مالكم بالطويله عطاني قسيمة سرعه مع اني ماسويت شي وسامحني على خطأي الصحيح

وهو تابعية الموتر اللي لها 3 سنين مطوفه معلينا هذا النظام ولازم نقول سم ياسم

واجيك مسيد على السوق ونصل

والحمدلله حوالي

الساعه 4.44 عصرا والبق العراوي في مواقف السوق المضلله المتكيفه واقول للسكرتي انتبه

للعراوي

تراه عزيز وغالي مارد عليه وقعد يتحمد ربه

المهم درعمنا بالسوق واذا ذاك البزر اللي يتراوح عمره بين السابعه والسابعه ومعه عربية التحميل

وهو

يووووووووز من جنبي بغى يقشع كراعيني وهو يستأسد بجانبي تبي عربيه قلت تعال مدامك

صغيرووووووون

نشجعك وانت اولى من البنقالي ويجي معي ومن بسطه الى بسطه حتى انتهينا واخذنا مااردنا

وحملتها على العربيه

لان غالب الاشياء مايقدر يشيلها الوليد وانطلقنا واذا الوليد تقول لعبة ونان ماشاء الله ماتسمع

الالالالالالالا

وزززززززززززززززز وزززززززززززززززز اركد ياولد قالي لازم ياعم كذا والا مش هنخلص ولا بكره

قلت امرنا لله انطلق ياولدي وانا الحقك تراه عراوي ولوحته مميزه ا ط ن 7777 المهم وصلنا برعاية

الله وحفظه

الى العراوي وتم التحميل من طرفي واقوله كم حقك قالي اللي يجي منك ياعم وانا اقعد في حيص

بيص

لان اسعارهم ريالين ولكنهم صارو يستخدمون هذه الجمله لوضعك في وضع محرج وتعطيهم اكثر

لاننا شعب

؟؟؟؟؟؟؟؟؟؟؟؟

وللعلم الاسعار بين بسطه وبسطه السعر يختلف وبقوه طيب ليش اختلاف الاسعار واذا الاجابه

موحده

الطيب عندي انا وبس مع انهم يأخذون من منبع واحد

المهم يووووووه تعبت دقينا سلف العراوي ونجيك معودين للبيت واذا الوقت على صلاة المغرب واذا

انت ترى

الحروب العالميه في الدائري الجنوبي بسبب التريلات والنقليات وشبابنا المتحضر فقلت مابدهاش

مالنا الا

حوارينا القديمه ونخرم من حاره الى زقاق الى ان وصلنا الى البيت بعد المغرب بشلقة دقايز

وانا انبعج من الانبساط بااني وصلت الى البيت ولم يكن هناك كدمات كثيره لي او للعراوي سوى

ماذكر سابقا

والحمدلله

هذه رحلتي بسبب التنظيم الجيد وشوارعنا الفاضيه دائما

شخابيطي ارجوا ان تنال رضاكم

مجرد تسائل هل الخطاء من البشر ام من العراوي

دمتم بود





عراويكم

ماشاء الله اخوي خيالك واســــــــــع
ههههه
طريقتك مشوقه في سرد القصه ولواني مافهمت بعض الكلمات
ولكن ابداع
تسلم ايدك

الحق عليك يابوخالد
المفروض تمشي نظامي رخصه واستماره هههههههه
والحمد لله على سلامتك وسلامة العراوي
لكن متى يشغلون الطائرات الخاصه في الرياض ؟
لان الظاهره ابو ابراهيم يستخدمها حاليا :224:
:23:

يعطيك العافية

https://www.youtube.com/watch?v=OM41wIewwtY

اقتباس:

---

المشاركة الأصلية كتبت بواسطة amira

ماشاء الله اخوي خيالك واســــــــــع
ههههه
طريقتك مشوقه في سرد القصه ولواني مافهمت بعض الكلمات
ولكن ابداع
تسلم ايدك

---

شرفتينا بمرورك اوخيه

صحيح بعض الكلمات تحتاج لها معجم لترجمتها لانها من ايام الزمن الجميل

اسعدتنا الله يسعدك وجمعة هنية طيبة تنسيك ما مر بك في عصر ذاك اليوم


والله كانت روحة فيها مشقة والله يعينك على روحة سوق الخضار

ابداع في التحليل والروايات

يعطيك الف عافيه

يعطيك العافيه عراويكووووووو

مبدع وارد عراوي كعادتك
الظاهر تركت الجماعه اللي انت خابر
القهوه عندي القابله قل تم
ههههههههههه

بارك الله فيك يا وارد عراوي