معقول أغير عقول الخلق و أقنعها...!!!!!

معقول أغير عقول الخلق و أقنعها ***** ماهوب معقول ياللي قال معقوله
يا خي أنا يا لله بنفسي أطوعها ***** ما لي على الخلق لا حكم ولا طوله
يا الأجودي لو بنفسك شي موجعها ***** هالوقت غير كثير نفوس بسهوله
نفس ذليله تشوف المال يرفعها ***** ونفس عزيزه تركها الفقر مذلوله
ورِجْلٍ يجيها اللحاف بطقة إصبعها ***** ياللي يمدد بقد إلحافه رجوله
أثبت لك إنا مع أنفسنا نخادعها ***** وإنا نعيش الهزيمه كنها بطوله
نقول دنياك لو ما طاعتك طعها ***** وهي عمرها ما طيع الحي بميوله
وبإسم الرجوله عقب ما الوقت شيعها ***** قمنا نكابر بوقت ما به رجوله
أحلامنا كذبةٍ عشنا نرقعها ***** ونضحك على بعضنا بأحلام مقتوله
بيدين مشلولةٍ نبني مرابعها ***** با لله من قد بنا بيدين مشلوله ؟
والنيه الطيبه من طيب منبعها ***** وكلٍ على قدر طيبه يسرج خيوله
مثل القصيده يدلك طيب مطلعها ***** عنها وتبقى بكل لسان مقيوله
ما نيب مخبول يعشق بنت ضيعها ***** و لا سالفه عاقلٍ هايم بمخبوله
السالفه كان ودك تعرف إسمعها ***** يا للي تلوم الدحيمي إسمع لقوله
زرعت ورده وليتني قبل ما أزرعها ***** في روض مشتل نشدت الروض منهو له
ويوم أزهرت شفت راع الروض يقلعها ***** قدام عيني وأنا بيدين مغلوله
وقّفت مغلول وعيوني مدامعها ***** تشهق بدمعٍ وقف بعيون مذهوله
صوت يا عم تكفى بس أطالعها ***** و أشحذ وجيه العرب و أقول قولو له
عين تجوع السهر من شان تشبعها ***** يا تنعمي يا تخلي النفس معلوله
قالوا تبيها نصيحه بندقك بعها ***** ما هيب صوب الجفول ولا هي بحوله
وأمسيت وأنا أطفي الشمعه وأولعها ***** في حروة الفجر مير الليل يا طوله
إن لمت عينٍ بكتها الثانيه معها ***** و إن جيت أبنسى ولا هو شي يا هوله
من عقبها النفس طاري الورد يفجعها ***** وألعن أبو الورد كله وأعشق ذبوله
وآخر سؤالٍ حرم هالعين مضجعها ***** وأقفت تشوف الحقيقة شبه مجهوله
إذا قصيدك مهوب للناس تِسمعها ***** ممكن تقل لي قصيدك أنت وش هو له
يا خي أكفّر ذنوبي يمكن أبلعها ***** لكن أكفر ذنوب الخلق معقوله . . !!!

أَمرّ مُرٍ مَرْ في دنيتي لي === و أمرّ مُرٍ مَرْ لي في حياتي

ليا وصِفْت بشي شين مهو بي ***** ودي تجيني قبل ياتي وفاتي

إن إعتذرته ظن ظن الردى في ***** و أنا الردى ماهو صفه من صفاتي

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~

ويقول عنترة :

لا تسقني ماء الحياة بذلة ***** بل فأسقني بالعز كاس الحنظل

ماء الحيـــاة بذلة كجهنـــــم ***** وجهنـــم بالعز أطيب منــــــــزل

مع إعجابي الشديد بالشطر الاول من البيت الثاني
وتحفظي على الشطر الثاني من البيت نفسه ، أجارنا الله وإياكم من نار جهنم

أبيت النية على نية آروح ***** ويردني للمنتدى بعض الأقلام

أقلام تنزف إبداعها ينعش اروح ***** أعيش معها مبتهج كل الأيام

أيام في صرحٍ للأحباب مفتوح ***** أخير من ركض ورى بعض الأعلام

أعلام تبني صروح تهدّم صروح ***** في مظهر يغريك سكبه وهندام

وهندام ناس نهجهم منهج البوح ***** هم لي سند وأنا لهم درع وحزام

إحزام من ينسب لسالم ومسروح ***** وإحزام من ينسب إلى دين الإسلام

أحاول آشارك لو الصوت مبحوح ***** من شان دفع المنتدى شوي قدام

لو كان مالي بأغلب الحمل منطوح ***** وضع إنتمائي صار يلزمني إلزام

والآدمي ماجاه مكتوب بالوح ***** من يوم حط الروح به رب الآنام

إحزام من ينسب لسالم ومسروح *(من قبيلة حرب ؟؟؟؟)

اقتباس:

---

المشاركة الأصلية كتبت بواسطة حمزه

إحزام من ينسب لسالم ومسروح *(من قبيلة حرب ؟؟؟؟)

---

أيه يابعدي حربي والقصيدة منقوله
وصبحك الله بالخير يابو محمود

هلا بابن العم ونعم فيك
ويمكن عوفي

اقتباس:

---

المشاركة الأصلية كتبت بواسطة حمزه

هلا بابن العم ونعم فيك
ويمكن عوفي

---

ما عليك زود
لا ، ماني عوفي
شكلك قلت عوفي عشان إسم الولد الله صلحه ويطلع لخواله!

الإخوة المشرفين
السلام عليكم ورحمة الله وبركاتة
أرجو إغلاق الموضوع إذا كانت شروط المنتدى تسمح لي بطلب ذلك
ودمتم ،،،

اخوي ابو عوف سوف يتم إغلاق الموضوع بناء على طلبك